ԵՄ-ի հետ մեկնարկեցինք բարձր մակարդակի քաղաքականության երկխոսությունը. Գրիգորյան․ ՏԵՍԱՆՅՈՒԹ

«ՀՀ-ԵՄ հարաբերությունների օրակարգը համալրվել է նոր, կարևոր բաղադրիչներով, այդ թվում՝ քաղաքական և անվտանգության մեկնարկով»,– այս մասին հայտնեց ՀՀ փոխվարչապետ Մհեր Գրիգորյանը ԵՄ ընդլայնման հարցերով հանձնակատար Մարթա Կոսի հետ համատեղ հայտարարության ժամանակ՝ նշելով, որ ԵՄ-ի հետ մեկնարկել է բարձր մակարդակի քաղաքականության երկխոսություն։

Գրիգորյանը հույս հայտնեց, որ ՀՀ-ԵՄ նոր օրակարգը Բրյուսելում կայանալիք ՀՀ-ԵՄ գործընկերության խորհրդի հավանությանը կարժանանա։

«Վստահ եմ, որ այս գործընթացը կնպաստի մեր հարաբերությունների հետագա խորացմանը, ինչպես նաև ՀՀ-ի ժողովրդավարական և տնտեսական բարեփոխումների առաջընթացին։ Այս առումով հետևողականորեն շարունակելու ենք աշխատանքները Համապարփակ և ընդլայնված համաձայնագրի լիարժեք իրագործման ուղղությամբ՝ կարևորելով ԵՄ լավագույն փորձի տեղայնացումը որպես մեր բարեփոխումների օրակարգի անբաժանելի մաս»,– նշեց Հայաստանի փոխվարչապետը։

Նա նաև ընդգծեց, որ ՀՀ կառավարությունը բարձր է գնահատում ԵՄ շարունակական աջակցությունը։ Մհեր Գրիգորյանի խոսքով՝ ԵՄ-ն վստահելի գործընկեր է մեր երկրի սոցիալ-տնտեսական դիմակայության ամրապնդման, բարեփոխումների և տարածաշրջանային կայունության ամրապնդման ճանապարհին։

«Հայաստանը հավատարիմ է տարածաշրջանային կապակցվածության օրակարգին։ Վաշինգտոնում և Բրյուսելում կայացած բարձր մակարդակի հանդիպումների ընթացքում ձեռք բերված պայմանավորվածությունները, ներառյալ Խաղաղության պայմանագրի նախաստորագրումն ու եռակողմ հռչակագիրը, մեզ նոր հնարավորություններ են տալիս ենթակառուցվածքների ապաշրջափակման, «Խաղաղության խաչմերուկի» և «Թրիփ» նախագծի համար։ Այս նախաձեռնությունները միմյանց փոխլրացնող են և ներդաշնակ են «ԵՄ գլոբալ դարպաս» ռազմավարության հետ»,– հավելեց նա։

Անդրադառնալով վիզաների ազատականացման գործընթացին՝ փոխվարչապետը վստահություն հայտնեց, որ այս ուղղությամբ համատեղ ջանքերով կունենան շոշափելի արդյունքներ։

Մանրամասները՝ տեսանյութում։
Մանյա Պողոսյան