Սա ինքնության ոչնչացում է, տպավորություն է՝ Ադրբեջանն է այս թուղթը գրել, սա նվաստացման հռչակագիր է․ Արամ Մանուկյան․ ՏԵՍԱՆՅՈՒԹ

Հայ ազգային կոնգրեսի փոխնախագահ Արամ Մանուկյանը Factor TV-ի հետ հարցազրույցում ասում է, որ ՀՀ իշխանության առաջարկած խաղաղության նախաձեռնությունը չի կարող համարվել արժանապատիվ․

«Իշխանության խաղաղության ծրագիրը արժանապատիվ չէ։ Մեր տեսլականը շատ ավելի լայն է․ պետք է ներգրավվեն ԱՄՆ-ը, Ռուսաստանը և Իրանը։ Միայն այդ ձևաչափով կարելի է հավասարակշռել վտանգները և ապահովել խաղաղություն»,- ընդգծում է Մանուկյանը։

Նա խիստ քննադատում է նաև վարչապետ Փաշինյանի վերջին ելույթները՝ անվտանգության ընդհանուր հայեցակարգի մասին, դրանք անվանելով նվաստացնող․

«Արժանապատվության նշույլ չկա։ Բանակի 25 տոկոս կրճատում, ռազմական բյուջեի չավելացում․ սա նշանակում է՝ մենք պետականորեն հրաժարվում ենք ինքնապաշտպանությունից»։

Մանուկյանի համոզմամբ՝ ապաշրջափակման գործընթացը չի կարող լինել միայն Երևանի և Բաքվի երկխոսության արդյունք, և տարածաշրջանի կարևոր դերակատարները պետք է ներգրավված լինեն․

«Ապաշրջափակումը պետք է տեղի ունենա ԱՄՆ-ի, Ռուսաստանի և Իրանի շահերի համատեղությամբ։ Եթե դա արվի միայն իշխանության ներկայիս առաջարկով, կոնֆլիկտը չի բացառվի, այլ կշարունակի մնալ սրված վիճակում»։

Արցախյան հարցի շուրջ ՀԱԿ փոխնախագահը նշում է․
«Արցախը վերադարձնելը ռեալիստական չէ․ դա նոր պատերազմի ճանապարհ է։ Բայց ռեալ է հայերի իրավունքների պաշտպանությունը՝ միջազգային մեխանիզմներով։ Սա այն ուղղությունն է, որ պետք է զարգացնել»։

Խոսելով «Իրական Հայաստանի գեղագիտական հայեցակարգից», որը շրջանառության մեջ է դրել իշխանությունը, Մանուկյանը փաստաթուղթը ոչ միայն զուրկ է համարում իրատեսությունից, այլև ազգային ինքնության նկատմամբ հարված է որակում․

«Կառավարությունում չկա՞ր մեկը, ասեր՝ էս ի՞նչ զազրախոսություն է։ Եթե երեխան Մասիսը նկարի, կխախտի կառավարության հայեցակարգը։ Սա երազային փաստաթուղթ է Ադրբեջանի համար։ Տպավորություն է, որ այս թուղթը գրվել է Բաքվում։ Սա ոչ թե հայեցակարգ է, այլ նվաստացման հռչակագիր»։

Հարցազրույցն ամբողջությամբ՝ տեսանյութում։

Ռոբերտ Անանյան