02.11.2026 | 15:48
Իրանը հայտարարել է, որ պատրաստ է երկու օրվա ընթացքում վերաբացել Հորմուզի նեղուցը, եթե ԱՄՆ-ը համաձայնի իր պայմաններին
ՀԱՊԿ-ը ելնում է Հայաստանի հայտարարություններից, որ կազմակերպությանն իր մասնակցությունը սառեցված է․ ՌԴ ԱԳՆ
Քաղաքականություն
18.09.2025 | 15:59
Հավաքական անվտանգության պայմանագրի կազմակերպությունը (ՀԱՊԿ) ելնում է Երևանի հայտարարություններից, որ Հայաստանի մասնակցությունը կազմակերպության աշխատանքներին սառեցվել է։ Այս մասին ՏԱՍՍ-ին ասել է ՌԴ ԱԳ նախարարության ԱՊՀ երկրների առաջին դեպարտամենտի տնօրեն Միքայել Աղասանդյանը։
«Մենք ելնում ենք նրանից, որ Հայաստանը մնում է ՀԱՊԿ անդամ՝ բոլոր բխող պարտավորություններով և իրավունքներով։ Հայաստանը պետք է ինքը որոշի ՀԱՊԿ միջոցառումներին իր մասնակցության ձևաչափը, ոչինչ չի պարտադրվում։ Մենք ելնում ենք Հայաստանի ղեկավարության կողմից արտահայտված դիրքորոշումից. Երևանի մասնակցությունը կազմակերպության աշխատանքներին «սառեցված է»»,- նշել է դիվանագետը՝ պատասխանելով ՀԱՊԿ միջոցառումներին մինչև տարեվերջ Հայաստանի լիարժեք մասնակցության հնարավորության մասին հարցին։
Հարցին էլ՝ արդյո՞ք Երևանը Բաքվի հետ շրջանակային համաձայնագրի ձեռքբերումից հետո ազդանշան է տվել վերսկսել մասնակցությունը ՀԱՊԿ-ին, Աղասանդյանը պատասխանել է. «Կարծում եմ՝ ՀԱՊԿ-ին Երևանի մասնակցության վերաբերյալ հարցը պետք է հասցեագրել հենց Երևանին։ Դուք գիտեք Հայաստանի պաշտոնական դիրքորոշումը, որը բազմիցս արտահայտվել է։ Դեռ, որքան ինձ է հայտնի, փոփոխություններ չկան»։
Թարգմանությունը՝ Էմմա Չոբանյանի
