ՌԴ-ն խիստ թուլացել է, բայց ոչ այնքան, որ կորցնի ՀՀ-ի վրա իր լծակները․ 2026-ի ԱԺ-ն Կրեմլի քավորությամբ կձևավորվի․ Վահե Գասպարյան․ ՏԵՍԱՆՅՈՒԹ

ԱԺԲ խորհրդի անդամ Վահե Գասպարյանը Factor TV-ի հետ հարցազրույցում, խոսելով ռուս-ուկրաինական պատերազմի և դրա տարածաշրջանային հետևանքների մասին, ասել է, որ Վլադիմիր Պուտինի վարած քաղաքականությունը կործանարար է ոչ միայն Ուկրաինայի, այլև Եվրոպայի և հետխորհրդային տարածքի համար։ Գասպարյանի համոզմամբ՝ պատերազմը կանգնեցնելը Պուտինի համար հավասարազոր է սեփական շրջապատի կողմից ոչնչացմանը. «Շարունակելը կենդանի մնալու միակ միջոցն է։ Պուտինն իր անձնական անվտանգությունն է պահում՝ պատերազմը երկարաձգելով»։

Թեև ԱՄՆ նախագահ Դոնալդ Թրամփից սպասելիքները մեծ էին, պատերազմը չկանգնեցվեց, փոխարենը Վաշինգտոնը սկսեց Ուկրաինային մատակարարել հարձակողական զենք, ինչը կարող է արագացնել Պուտինի ռեժիմի տապալումը։

«Պուտինը սադրանքի դիմեց՝ հիբրիդային պատերազմ սկսեց Եվրոպայի դեմ։ Նա փորձում է ստիպել Արևմուտքին զիջման գնալ Ուկրաինայի հարցում։ Սակայն այս վտանգավոր խաղը ձեռնտու չէ ո՛չ ՌԴ վերնախավին, ո՛չ էլ Չինաստանին. կարող են խորտակվել և զրկվել իրենց հարստություններից»,- ընդգծում է Գասպարյանը։

Գասպարյանը նաև նշում է, որ ԱՄՆ-ն իր դիրքավորումը ցուցադրեց այսպես կոչված «Զանգեզուրի միջանցքի» հարցում՝ նպատակ ունենալով ձեռնոց նետել տարածաշրջանում ձևավորված ռուս-թուրքական ճարտարապետությանը. «Ամերիկյան ներկայությունը փլուզում է ՌԴ-Թուրքիա ճարտարապետությունը և երկուսին էլ դուրս է մղում տարածաշրջանից»։

Միևնույն ժամանակ, ըստ նրա, ՌԴ-ն թուլացել է, բայց դեռևս պահպանում է լուրջ լծակներ Հայաստանի նկատմամբ. «Կրեմլի ազդեցությունը շարունակվելու է, և վտանգ կա, որ 2026-ի ԱԺ-ն ձևավորվի հենց նրա քավորությամբ»։

Այսպիսով, Վահե Գասպարյանի գնահատմամբ, աշխարհաքաղաքական զարգացումները վկայում են, որ Պուտինի քաղաքականությունը դատապարտված է ճգնաժամի հենց ՌԴ-ի համար, իսկ Հայաստանի համար լուծումը ՌԴ կախվածությունից աստիճանական ու գործնական դուրս գալն է՝ զուգահեռաբար ամրապնդելով հարաբերությունները Արևմուտքի հետ։

Հարցազրույցն ամբողջությամբ՝ տեսանյութում։

Ռոբերտ Անանյան