30.07.2026 | 00:02
Որպես անհետ կորած որոնվում է 2012թ. ծնված Վահե Ապիկյանը
ՌԴ-ում ադրբեջանական համայնքային կազմակերպության ևս մեկ ղեկավար է զրկվել ռուսական քաղաքացիությունից
Քաղաքականություն
17.09.2025 | 18:23
Մոսկվայի ադրբեջանցիների ազգային-մշակութային ինքնավարության նախագահ Բախտիյար Հասանովը զրկվել է ՌԴ քաղաքացիությունից։ Այս մասին հայտնում են ադրբեջանական լրատվամիջոցները՝ վկայակոչելով ռուսական աղբյուրներին։
Նշվում է, որ ադրբեջանական համայնքի կազմակերպության ղեկավարի ռուսական անձնագիրը չեղյալ է հայտարարվել։ Նա Ռուսաստանի քաղաքացիություն է ստացել 2000-ականներին։ Պնդվում է, որ քաղաքացիությունից զրկելու հիմքը Հասանովի երկարատև կապերն են ստվերային սխեմաների հետ, այդ թվում՝ անօրինական ներգաղթի կոծկումը, կեղծարարությունը և էթնիկ հողի վրա հիմնված կոնֆլիկտների ստեղծումը։
Բախտիյար Հասանովը 2022 թվականին ընտրվել է Մոսկվայի ադրբեջանցիների ազգային մշակութային ինքնավար ասոցիացիայի նախագահ։
Ռուսական Readovka տելեգրամ ալիքն ընդգծում է, որ Հասանովը բազմիցս աջակցություն է հայտնել Ադրբեջանի նախագահ Իլհամ Ալիևին։
«Մենք հպարտ ենք, որ ունենք նման նախագահ՝ աշխարհի ամենահեղինակավոր առաջնորդներից մեկը»,- հայտարարել է նա Ադրբեջանի նախագահին ուղղված 2023 թվականի շնորհավորական նամակում։
Հասանովի անունը բազմիցս հիշատակվել է նաև նրա նախագծերի և գործարար կապերի շուրջ վիճահարույց պատմությունների հետ կապված հրապարակումներում։ Նրա ելույթը Մոսկվայի պետական լեզվաբանական համալսարանում նույնպես իրարանցում էր առաջացրել։ Ռեկտորին նվեր հանձնելիս նա նշել էր, թե այն «հատուկ բերվել է Շուշի քաղաքից», իսկ ավելի ուշ նամակագրության մեջ կնոջը գրել, որ այդպիսով «հագցրել է հայերին»։
Ուժային կառույցներում Readovka-ի աղբյուրի խոսքով՝ Հասանովն Ադրբեջանում ազդեցիկ հովանավորներ է ունեցել, սակայն քաղաքացիությունը կորցնելուց հետո նրա հնարավորությունները՝ պաշտոնապես շահեր ներկայացնելու շահեր և պաշտոններ զբաղեցնելու Ռուսաստանի տարբեր խորհուրդներում, փաստացի, կնվազեն։
Հիշեցնենք, որ ավելի վաղ էլ Մոսկվայի մարզի ադրբեջանցիների տարածաշրջանային ազգային-մշակութային ինքնավարության ղեկավար Էլշան Իբրահիմովն էր զրկվել ՌԴ քաղաքացիությունից։
Թարգմանությունը՝ Էմմա Չոբանյանի
