13.08.2026 | 14:11
Ռուսաստանը և Ուկրաինան զոհված զինվորների մարմիններ են փոխանակել
Մոսկվայում ադրբեջանական սփյուռքի ղեկավարին զրկել են ՌԴ քաղաքացիությունից
Քաղաքականություն
04.07.2025 | 20:34
Մոսկվայի և Բաքվի հարաբերությունների լարվածության ֆոնին՝ ՌԴ Մոսկվայի մարզի ադրբեջանցիների տարածաշրջանային ազգային-մշակութային ինքնավարության ղեկավար Էլշան Իբրահիմովը զրկվել է ՌԴ քաղաքացիությունից։ Ադրբեջանական Oxu.Az-ի հետ հեռախոսազրույցում նա հաստատել է այս տեղեկությունը։
Հարցին՝ ինչո՞վ է պայմանավորում Ռուսաստանի իշխանությունների այս որոշումը, նա պատասխանել է, որ մի քանի օրից կգնա Ադրբեջան, և մեկնաբանություն կտա։
ՌԲԿ-ն էլ նշում է, որ Էլշան Իբրահիմովը հունիսի 18-ին զրկվել է ՌԴ քաղաքացիությունից՝ «Ռուսաստանի Դաշնության ազգային անվտանգությանը սպառնացող գործողություններ կատարելու» համար։
Հիշեցնենք, որ նախօրեին էլ ՌԴ-ում ադրբեջանցի երկու ազդեցիկ քրեական հեղինակություն էր ձերբակալվել։
Ադրբեջանի և Ռուսաստանի հարաբերությունները սրվել են այն բանից հետո, երբ հունիսի 27-ին Եկատերինբուրգում ձերբակալվել էին ադրբեջանական ծագում ունեցող ավելի քան 50 անձինք։ Ձերբակալության ընթացքում մահացել է առնվազն երկու մարդ՝ Ադրբեջանի 60-ամյա քաղաքացի Հուսեյն Սաֆարովը և նրա եղբայրը՝ 55-ամյա Զիյադդինը։ Եվս երեք մարդ տեղափոխվել է վերակենդանացման բաժանմունք։ Բաքուն պահանջել է պատասխանատվության ենթարկել մեղավորներին, իսկ Ադրբեջանի արտաքին գործերի նախարարությունը «խիստ բողոք» է հայտնել Ռուսաստանի դեսպանին։
Ադրբեջանի Գլխավոր դատախազությունը քրեական գործ է հարուցել Ռուսաստանի անվտանգության ուժերի կողմից իր քաղաքացիների խոշտանգումների և սպանության փաստով։
Թարգմանությունը՝ Էմմա Չոբանյանի
