ԱՄՆ դատախազությունը մահապատիժ է պահանջելու Թրամփի կողմնակից Չարլի Քըրքի սպանության մեջ մեղադրվողի համար

ԱՄՆ Յուտա նահանգի դատախազները հայտարարել են, որ մահապատիժ են պահանջելու պահպանողական ակտիվիստ, նախագահ Դոնալդ Թրամփի աջակից Չարլի Քըրքի սպանության մեջ մեղադրվող տղամարդու համար և բացահայտել են  գործի նոր մանրամասներ, այդ թվում՝ տեքստային հաղորդագրություններ, որոնցում նա, իբր, խոստովանել է սպանությունը, գրում է Euronews-ը։

22-ամյա Թայլեր Ռոբինսոնը գրություն է թողել, որում նշել է, որ ծրագրել է սպանել Քըրքին, և կրակոցից հետո խոստովանել է հանցագործությունը, նշվում է փաստաթղթերում։

«Ես հոգնել եմ նրա ատելությունից»,- ասել է կասկածյալը իր սենյակակցին, որին պաշտոնյաներն անվանել են կասկածյալի զուգընկեր։

Ռոբինսոնը նաև պնդել է, որ հարձակումը ծրագրել է ավելի քան մեկ շաբաթ, հայտնել են դատախազները։ Հետագա հաղորդագրություններում Ռոբինսոնն ասել է, որ զղջում է, որ չի վերադարձել և չի վերցրել սպանությունից անմիջապես հետո թփերի մեջ նետած հրացանը՝ նշելով, որ այն պատկանել է իր պապիկին։

Ըստ դատախազների՝ կասկածելի սպանության զենքի ձգանի վրա հայտնաբերված ԴՆԹ-ն նույնպես պատկանում է Ռոբինսոնին։

Երեքշաբթի Յուտայի ​​շրջանային դատախազությունը, Ջեֆրի Գրեյի գլխավորությամբ, մեղադրանք է առաջադրել Ռոբինսոնին յոթ քրեական հոդվածով, այդ թվում՝ ծանրացուցիչ հանգամանքներում սպանության, ապացույցների ոչնչացման միջոցով արդարադատությանը խոչընդոտելու և վկաների կեղծման, այն բանի համար, որ նա խնդրել էր իր զուգընկերոջը, որը տրանսգենդերային անցման փուլում է, ջնջել հաղորդագրությունները։

Որոշ քաղաքական գործիչներ, այդ թվում՝ ԱՄՆ նախագահ Դոնալդ Թրամփը, կոչ են արել այս դեպքի համար մահապատիժ սահմանել։

Մամուլի ասուլիսում Ջեֆրի Գրեյը նշել է, որ մահապատիժ պահանջելու որոշումը կայացրել է «անկախ՝ հիմնվելով միայն առկա ապացույցների, հանգամանքների և հանցագործության բնույթի վրա»։

Ռոբինսոնն առաջին դատական ​​նիստից մասնակցել է բանտից տեսակապի միջոցով։ Յուտայի ​​չորրորդ շրջանի դատավոր Թոնի Գրաֆը հայտարարել է, որ նրա համար պաշտպան կնշանակի մինչև հաջորդ դատական ​​նիստը, որը նշանակված է սեպտեմբերի 29-ին։

Քաղաքական ակտիվիստ, ԱՄՆ նախագահ Դոնալդ Թրամփի կողմնակից Չարլի Քըրքը սպանվել էր Յուտա նահանգում Վելիի համալսարանի տարածքում ելույթ ունենալիս։ Գնդակը դիպել էր Քըրքի պարանոցին։ Նա ծանր վիճակում տեղափոխվել էր հիվանդանոց, իսկ մի քանի ժամ անց ԱՄՆ նախագահ Դոնալդ Թրամփը հայտարարել էր Քըրքի մահվան մասին։

Թարգմանությունը՝ Էմմա Չոբանյանի