16.07.2026 | 12:37
Ուկրաինական ԱԹՍ-ները գրոհել են Էնգելսը․ թիրախում ռազմական օդանավակայանն է
Սպասում ենք դրական առաջընթացին ՀՀ-ի և Ադրբեջանի միջև խաղաղության պայմանագրի սստորագրման․ ԱՄԷ նախագահը՝ Ալիևին
Քաղաքականություն
16.09.2025 | 19:57
ԱՄԷ-ն մեծ նշանակություն է տալիս Կովկասյան տարածաշրջանում խաղաղության և կայունության հաստատմանն ու հետաքրքրված է տարածաշրջանի բոլոր երկրների հետ կապերի և համագործակցության զարգացմամբ։ Ադրբեջանական լրատվամիջոցների հաղորդմամբ՝ այս մասին հայտարարել է ԱՄԷ նախագահ շեյխ Մոհամմեդ բին Զայեդ ալ-Նահյանը Ադրբեջանի նախագահ Իլհամ Ալիևի հետ Շուշիում ընդլայնված կազմով հանդիպման ժամանակ։
«Այս համատեքստում մենք անհամբեր սպասում ենք ձեռք բերված հաջողությունների շարունակմանը և դրական առաջընթացին Ադրբեջանի և Հայաստանի միջև խաղաղության պայմանագրի ստորագրման ուղղությամբ»,- ընդգծել է ԱՄԷ նախագահը։
Նա նշել է, որ ԱՄԷ-ն կրկին ընդգծում է իր պատրաստակամությունը՝ տարածաշրջանում խաղաղության և կայունության հաստատման, ինչպես նաև ժողովուրդների խաղաղ համակեցության համար ցանկացած հնարավոր աջակցություն ցուցաբերելու համար։
Հավելենք, որ այսօր ԱՄԷ նախագահը ժամանել է Արցախ։ Շուշիում տեղի են ունեցել նրա բանակցությունները Ադրբեջանի նախագահ Իլհամ Ալիևի հետ։
Երկու երկրների ղեկավարների մասնակցությամբ տեղի է ունեցել Ադրբեջանի և Արաբական Միացյալ Էմիրությունների միջև ստորագրված փաստաթղթերի փոխանակման արարողություն։ Ադրբեջանական լրատվամիջոցների հաղորդմամբ՝ կողմերի միջև ստորագրվել է 14 փաստաթուղթ, այդ թվում՝ Ադրբեջանի և Միացյալ Արաբական Էմիրությունների միջև համապարփակ ռազմավարական գործընկերության մասին համատեղ հռչակագիրը։
Թարգմանությունը՝ Էմմա Չոբանյանի
