Մեծ խաղ է, զոհաբերում են ուկրաինացիներին, մեզ էլ կուլ են տալու, եթե տգետ մնացինք․ Միքայել Հայրապետյան. ՏԵՍԱՆՅՈՒԹ

Հանրային գործիչ Միքայել Հայրապետյանը Factor TV-ի հետ զրույցում Լեհաստանի դեմ ռուսական ԱԹՍ-ների ուղարկելու և ռուս-ուկրաինական պատերազմի ներկա ընթացքը դիտարկում է «մեծ խաղի» տրամաբանության մեջ, որտեղ, նրա խոսքով, այսօր զոհաբերվում են ուկրաինացիները։ Նրա գնահատմամբ՝ Ռուսաստանը մեծ զոհերի գնով արնաքամ է անում Ուկրաինային, և խնդիրը միայն Վլադիմիր Պուտինը չէ․ «Ռուսներն են ուզում վերականգնել կայսերական ստատուսը»։

Նրա կարծիքով՝ Պուտինը մարդասպան է, սակայն պետք չէ մոռանալ, որ նույն բնորոշումը վերաբերում է նաև Պերմյակովին և ռուսական վերնախավի բազմաթիվ անդամների․ «ՌԴ-ն անհամարժեք է ժամանակակից աշխարհին»։ Հայրապետյանը համոզված է, որ մինչև ռուսների ներթափանցումը տարածաշրջան, հայ-թուրքական բախումներ ազգային հողի վրա չեն եղել․ «Մեզ ներարկվել է հայրենասիրության կայսերական կերպը»։

Անդրադառնալով Ադրբեջանի նախագահ Իլհամ Ալիևի այն խոսքին, թե ռեգիոնում խաղաղության շրջան է՝ Հայրապետյանը ընդգծում է․ «Ալիևը ԿԳԲ-ականի տղա է։ Դրանց և մարմնավաճառների խոսքը հիմք չէ։ Պահը գա՝ կռիվ կանի։ Չպետք է հավատալ նրանց խաղաղության մասին խոսքերին»։

Հանրային գործիչը մտահոգիչ է համարում նաև հայ հասարակության ներսում ստեղծված մթնոլորտը․ «Հայերն իրար ավելի շատ են ատում, քան ռուսներին ու թուրքերին։ Սա հոգեկան շեղման վիճակ է այն դեպքում, երբ իրական վտանգը հենց այդ երկրներից է գալիս»։

Նա կիսում է վարչապետ Փաշինյանի այն միտքը, որ հայերի շրջանում խորհրդային կայսրությունը ներարկել է հայրենասիրության իր մոդելը։ Նա հիշեցնում է նաև պատմական փորձը․ «Մենք թաքնվել ենք ռուս զինվորի հետևում և հայհոյել թուրքին։ Ռուսը մեզ ասում էր՝ «թուրքը ձեր գլուխը կպոկեր, ես չլինեի»։ Չե՞ք հավատում։ Ահա եկավ 1915 թվականը»։

Նրա գնահատմամբ՝ Ռուսաստանն այսօր ինքն իրեն է փորում գերեզմանը․ «Պուտինն ու նրա ագենտուրան, որ լցված են Հայաստան, հենց ՌԴ-ի գերեզմանափորներն են։ Չեկիստների սերունդը չի վերացել»։

Հարցազրույցն ամբողջությամբ՝ տեսանյութում։

Ռոբերտ Անանյան