10.06.2026 | 23:29
Հունիսի 7-ին կայացած ԱԺ ընտրությունները աննախադեպ էին. «Նոր ուժ»-ի հայտարարությունը
Բաքվի դատարանում Արցախի ղեկավարների շինծու գործերով նիստում 1988-92 թվականների փաստաթղթեր են ուսումնասիրվել
Քաղաքականություն
16.09.2025 | 09:45
Արցախի ղեկավարների, տարբեր պաշտոնյաների նկատմամբ հարուցված շինծու քրեական գործերով հերթական դատական նիստին Բաքվի զինվորական դատարանում մասնակցել են հայ գերիները, նրանց պաշտպանները, «տուժողներ», նրանց իրավահաջորդներն ու ներկայացուցիչները, ինչպես նաև պետական մեղադրանքը պաշտպանող դատախազները։
Ադրբեջանական լրատվամիջոցների հաղորդմամբ՝ նիստը նախագահող դատավոր Զեյնալ Աղաևը հայտնել է, որ հայ գերիներից Գուրգեն Ստեփանյանին տրամադրվել է նոր փաստաբան և հարցրել՝ արդյո՞ք նա առարկություններ ունի։ Ստեփանյանը նշել է, որ առարկություններ չունի նոր պաշտպանի վերաբերյալ։
Դատավարությունը շարունակվել է փաստաթղթերի հետազոտմամբ։ Ներկայացված փաստաթղթերից մեկը կասկածյալների և վկաների ցուցմունքներն են եղել Ստեփանակերտի մոտ Քրքջան բնակավայրում, իբր, «1988-1991 թվականներին տեղի ունեցած զանգվածային անկարգությունների և տեղի ադրբեջանցի բնակիչների տների ավերման վերաբերյալ»։
Համաձայն հրապարակված փաստաթղթի՝ կասկածյալի կարգավիճակով հարցաքննված Գեորգի Սարգսյանն իր ցուցմունքում, իբր, նշել է, թե «1988 թվականի սեպտեմբերի 18-20-ը հայերն ավերել և այրել են ադրբեջանցիների տները, իսկ ադրբեջանցիները վտարվել են Ստեփանակերտ քաղաքից»։
Ներկայացվել են նաև այլ փաստաթղթեր, իբր, «1988-92 թվականներին ադրբեջանցիների նկատմամբ կատարված հանցագործությունների» վերաբերյալ։
Հաջորդ դատական նիստը տեղի է ունենալու սեպտեմբերի 18-ին։
Թարգմանությունը՝ Էմմա Չոբանյանի
