Չվերթների ավելացում, Անիի կամրջի նորոգում, Գյումրի-Կարս երկաթգծի շահագործում․ Թուրքիայի ԱԳՆ-ն` Ռուբինյան-Քըլըչ հանդիպման մասին

Հայաստանի և Թուրքիայի միջև կարգավորման գործընթացի հատուկ ներկայացուցիչ Սերդար Քըլըչը ՀՀ ԱԳՆ-ում այսօր հանդիպում է անցկացրել գործընթացում Հայաստանի ներկայացուցիչ Ռուբեն Ռուբինյանի հետ։ Սա նրանց 6-րդ հանդիպումն էր։

Բանակցությունների վերաբերյալ հայտարարություն է տարածել Թուրքիայի ԱԳՆ-ն։

«Այս հանդիպման ժամանակ հատուկ ներկայացուցիչները հաստատել են այն հարցերը, որոնց շուրջ աշխատել և համաձայնեցվել էին նախորդ հանդիպումներում՝ Թուրքիայի և Հայաստանի միջև հարաբերությունների լիարժեք կարգավորման գործընթացն առաջ մղելու նպատակով: Այս համատեքստում նրանք մտքեր փոխանակեցին սահմանային անցումների վերաբերյալ 2022 թվականի հուլիսի 1-ի իրենց հանդիպման ժամանակ ձեռք բերված համաձայնագրի իրականացման վերաբերյալ: Հատուկ ներկայացուցիչները համաձայնել են արագացնել այս գործընթացը»,- ասվում է հայտարարության մեջ։

Հատուկ ներկայացուցիչները նաև որոշել են, որ երկու երկրների համապատասխան մարմինները կատարեն անհրաժեշտ տեխնիկական ուսումնասիրություններ Կարս-Գյումրի երկաթուղու և էլեկտրաէներգիայի միջկապակցման գծի վերականգնման և շահագործման համար։

«Նրանք նաև որոշել են, որ պետք է ջանքեր գործադրվեն մշակույթի և ակադեմիական ոլորտի համագործակցությունը ամրապնդելու համար, մասնավորապես, բարձրագույն կրթության ուսանողների համար կրթաթոշակային հնարավորություններ ստեղծելով և պատմական Մետաքսի ճանապարհի (Անի) կամրջի համատեղ վերանորոգմամբ», – ասվում է հայտարարության մեջ։

Նշվում է, որ կողմերը նաև համաձայնել են իրականացնել անհրաժեշտ աշխատանքները, որպեսզի այլ շահագրգիռ ընկերությունները սկսեն չվերթներ իրականացնել տարբեր ուղղություններով՝ սկսած 2026 թվականի ամռանից, այդպիսով ավելացնելով երկու երկրների միջև օդային երթուղիների և չվերթների քանակը։

Հատուկ ներկայացուցիչները վերահաստատել են իրենց հանձնառությունը՝ շարունակել այս գործընթացը առանց որևէ նախապայմանի։

Թարգմանությունը` Էմմա Չոբանյանի