Պեսկովը հայտարարել է, որ ռուս-ուկրաինական բանակցություններում այժմ դադար է

Ռուս-ուկրաինական բանակցություններում ներկայումս դադար է։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը, գրում է Ինտերֆաքսը։

«Կապի ուղիները գոյություն ունեն, դրանք ստեղծվել են, մեր բանակցողները հնարավորություն ունեն շփվելու այդ ուղիներով, բայց առայժմ, թերևս, կարող ենք խոսել դադարի մասին»,- ասել է նա ճեպազրույցի ժամանակ։

Բացի այդ՝ Պեսկովը նշել է, թե Ռուսաստանը նախկինի պես պատրաստ է ուկրաինական հակամարտության կարգավորման խաղաղ ճանապարհներ փնտրել, սակայն եվրոպացիները խոչընդոտում են այս գործընթացին։

«Ռուսական կողմը պահպանում է իր պատրաստակամությունը՝ գնալ խաղաղ երկխոսության, հակամարտության լուծման խաղաղ որոնման ճանապարհով։ Սակայն այն փաստը, որ եվրոպացիները խանգարում են, դա իսկապես այդպես է, ոչ մեկի համար գաղտնիք չէ», – ասել է ՌԴ նախագահի խոսնակը։

Պատասխանելով հարցին, թե կարելի է ասել, որ բանակցային գործընթացը փակուղի է մտել, Կրեմլի ներկայացուցիչն ասել․ «Այստեղ, իհարկե, չի կարելի վարդագույն ակնոցներ կրել և ակնկալել, որ բանակցային գործընթացը կայծակնային արագ արդյունքներ կտա»։

Հավելենք, որ Ալյասկայում ՌԴ նախագահ Վլադիմիր  Պուտինի հետ հանդիպումից հետո  ԱՄՆ նախագահ Դոնալդ Թրամփը հայտարարել էր, որ սկսել է Ուկրաինայի նախագահ Վլադիմիր  Զելենսկիի ու ՌԴ ղեկավարի  հանդիպման նախապատրաստումը։ ԶԼՄ-ները գրել էին, որ Սպիտակ տունը հույս ունի հանդիպում անցկացնել մինչև օգոստոսի վերջ, սակայն դա տեղի չունեցավ։ Պուտինի օգնական Յուրի Ուշակովն Ալյասկայում հանդիպումից հետո հայտարարել էր, որ երկու առաջնորդների հանդիպման  մասով որևէ պայմանավորվածություն չկա։

Ռուսաստանի նախագահ Վլադիմիր Պուտինն էլ  հայտարարել էր, որ եթե Վլադիմիր Զելենսկին պատրաստ է, թող Մոսկվա ժամանի, և նրանց հանդիպումը տեղի կունենա։

Զելենսկին էլ այսպես էր մեկնաբանել Ռուսաստանի նախագահի հրավերը։ «Կարծում եմ, որ, գիտեք, ուզում ես, որ հանդիպումը չկայանա, պետք է ինձ հրավիրել Մոսկվա։ Ռուսաստանը սկսել է խոսել հանդիպման մասին՝ դա արդեն վատ չէ։ Բայց մենք դեռ չենք տեսնում նրանց ցանկությունը՝ դադարեցնել պատերազմը», – ասել էր նա։

Թարգմանությունը՝ Էմմա Չոբանյանի