Քաղաքականություն
11.09.2025 | 20:30Վարչապետ Նիկոլ Փաշինյանը հայտարարեց, որ կան ուժեր թե՛ Հայաստանի ներսում, թե՛ դրսում, որոնք ցանկանում են «քայքայել և վիժեցնել օգոստոսի 8-ից հաստատված խաղաղությունը»։ Նրա խոսքով՝ խաղաղությունը պետք է զարգանա դեպի ինստիտուցիոնալ ուժեղացում, ոչ թե՝ ոչնչացում։
Factor TV-ի հետ հարցազրույցում քաղաքագետ Միքայել Զոլյանը պնդում է, որ Փաշինյանը նախևառաջ Կրեմլին է նկատի ունեցել․ «ՌԴ-ն երկար տարիներ կառավարում է կոնֆլիկտով․ եթե խաղաղություն հաստատվի, Մոսկվան զրկվում է լծակներից։ Այստեղից էլ բխում է Ռուսաստանի շահագրգռվածությունը՝ քայքայել խաղաղությունը»,- նշեց նա։
Զոլյանը հիշեցրեց նաև Ղարաբաղյան պատերազմի պատճառներն ու հետևանքները․
«Պատերազմը մեր ընտրությունն էր, բայց պարտությունը՝ անխուսափելի։ Դիսբալանս կար ուժերի միջև, և ՌԴ-ի դիրքորոշումը թեքում էր կշեռքը մեր դեմ»,- ասաց նա։
Քաղաքագետը համոզված է՝ պատերազմից հետո ԱՄՆ-ում ձեռք բերված համաձայնությունը Հայաստանի համար հնարավոր տարբերակներից արժանապատիվ տարբերակն էր։ «Սա կապիտուլյացիա չէ։ Սա այն մաքսիմալ արժանապատիվ խաղաղությունն է, որը հնարավոր էր ռազմական պարտությունից հետո»,- ընդգծեց Զոլյանը։
Ընդդիմության այն պնդումներին, թե իշխանությունը «հող է հանձնել», Զոլյանը հակադարձում է․ «Փաշինյանը հողերը չի հանձնել։ Պատերազմ տեղի ունեցավ, և ՀՀ-ն արեց ամեն ինչ տարածքները պահելու համար։ Բայց ընդդիմությունը շարունակում է մեղադրել հող հանձնելու մեջ»։
Նրա կարծիքով՝ ընդդիմադիր դաշտում արդեն ձախողված են մի շարք խաղադրույքներ, և դա իր ազդեցությունը կունենա 2026-ի ընտրությունների արդյունքների վրա․ «Նրանք համոզված էին, որ Ադրբեջանը նորից կհարձակվի, Թուրքիան կդառնա ավելի ագրեսիվ։ Բայց տեսանք՝ դա տեղի չունեցավ։ Այսօր էլ խոսում են, թե Սյունիքը կամ Երևանը հանձնվում են։ Իրականում ոչինչ չի հանձնվում, ուստի 2026-ին նրանք քիչ ձայն կհավաքեն»,- ասաց Զոլյանը։
Քաղաքագետը նաև ընդգծեց․ «Պատերազմի վտանգը մեծանում է, եթե չընդունես օգոստոսի 8-ի համաձայնագիրը։ Ընդդիմությունը շարունակում է մնալ պատերազմի տրամաբանության մեջ»։
Հարցազրույցն ամբողջությամբ՝ տեսանյութում։
Ռոբերտ Անանյան
