Բայրամովը ԱՄՆ Պետդեպի ներկայացուցիչների հետ քննարկել է Հայաստանի հետ հարաբերությունների կարգավորման գործընթացը

Ադրբեջանի արտաքին գործերի նախարար Ջեյհուն Բայրամովն ընդունել է ԱՄՆ Պետդեպարտամենտի Եվրոպայի և Եվրասիայի հարցերով բյուրոյի գլխավոր ներկայացուցիչ Բրենդան Հանրահանին։

Ադրբեջանի ԱԳՆ-ի հաղորդմամբ՝ հանդիպման ընթացքում կողմերը քննարկել են ադրբեջանա-ամերիկյան հարաբերությունները, ռազմավարական գործընկերության խարտիայի պատրաստման համար ռազմավարական աշխատանքային խմբի ստեղծման մասին փոխըմբռնման հուշագրից բխող հարցերը, Ադրբեջանի և Հայաստանի միջև հարաբերությունների կարգավորման գործընթացը, ինչպես նաև փոխադարձ հետաքրքրություն ներկայացնող տարածաշրջանային և միջազգային անվտանգության հարցեր։

Կողմերը մտքեր են փոխանակել երկկողմ հարաբերությունների երկարամյա պատմության, ինչպես նաև փոխշահավետ համագործակցության վերաբերյալ, այդ թվում՝ անվտանգության և էներգետիկայի ոլորտներում։

Հատկապես նշվել է այս տարվա օգոստոսին կայացած բարձր մակարդակի այցի և շփումների նշանակությունը երկրների միջև հարաբերությունների զարգացման համար։

«Ընդգծվել է Վաշինգտոնում Ադրբեջանի և Հայաստանի միջև խաղաղության օրակարգի առաջխաղացման վերաբերյալ Ադրբեջանի նախաձեռնությամբ ձեռք բերված պատմական համաձայնությունների նշանակությունը, այդ թվում՝ խաղաղության համաձայնագրի նախաստորագրումը և հակամարտությունից հետո մնացած կառույցների վերացումը»,-ասվում է հայտարարության մեջ։

Հավելենք, որ Ադրբեջանի նախագահ Իլհամ Ալիևի օգնական, նախագահի աշխատակազմի արտաքին քաղաքականության հարցերով բաժնի ղեկավար Հիքմեթ Հաջիևն էլ այցով ԱՄՆ-ում է, որտեղ մի շարք հանդիպումներ է անցկացրել։

Թարգմանությունը՝ Էմմա Չոբանյանի