22.05.2026 | 12:37
Արման Թաթոյանի ասուլիսը
Հաջիևն ԱՄՆ-ում մի շարք հանդիպումներ է անցկացրել
Քաղաքականություն
10.09.2025 | 14:11
Ադրբեջանի նախագահ Իլհամ Ալիևի օգնական, նախագահի աշխատակազմի արտաքին քաղաքականության հարցերով բաժնի ղեկավար Հիքմեթ Հաջիևն այցով ԱՄՆ-ում է։
Հաջիևը հանդիպել է ԱՄՆ Կոնգրեսի Ներկայացուցիչների պալատի արտաքին հարաբերությունների հանձնաժողովի նախագահ, կոնգրեսական Բրայան Մասթի և սենատոր Սթիվ Դեյնսի հետ: Այս մասին հայտնել է Վաշինգտոնում Ադրբեջանի դեսպանատունը, փոխանցում են ադրբեջանական լրատվամիջոցները։
Տեղեկատվության համաձայն՝ ընդգծվել է օգոստոսի 8-ին Վաշինգտոնում կայացած Ադրբեջանի նախագահ Իլհամ Ալիևի և ԱՄՆ առաջնորդ Դոնալդ Թրամփի միջև գագաթնաժողովի ռազմավարական նշանակությունը, դրա դրական արդյունքները ադրբեջանա-ամերիկյան հարաբերությունների և տարածաշրջանային խաղաղության համար։
Ադրբեջանի նախագահի օգնականը ընդգծել է 907-րդ ուղղման չեղարկման կարևորությունը և հրավիրել է խորհրդարանականներին այցելել Ադրբեջան։
Հիշեցնենք, որ օգոստոսի 8-ին Վաշինգտոնում տեղի էր ունեցել Հայաստանի, Ադրբեջանի, և ԱՄՆ առաջնորդների եռակողմ գագաթնաժողովը։ ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը Դոնալդ Թրամփի միջնորդությամբ, ստորագրել էին համատեղ հռչակագիր և նախաստորագրվել էր խաղաղության և միջպետական հարաբերությունների հաստատման մասին համաձայնագիրը։
Բացի այդ՝ Ադրբեջանի և ԱՄՆ ղեկավարները ստորագրել էին Բաքվի և Վաշինգտոնի միջև փոխըմբռնման հուշագիր՝ երկու կողմերի միջև ռազմավարական գործընկերության խարտիա պատրաստելու համար ռազմավարական աշխատանքային խումբ ստեղծելու վերաբերյալ։
Միևնույն ժամանակ, Թրամփը ստորագրել էր փաստաթուղթ «Ազատության աջակցության մասին» օրենքի 907-րդ հոդվածի կիրառման կասեցման մասին։
Հավելենք, որ ավելի վաղ Ադրբեջանի ԱԳ նախարար Ջեյհուն Բայրամովը հույս էր հայտնել, որ Թրամփի թիմը համապատասխան աշխատանք կկատարի ԱՄՆ Կոնգրեսի հետ՝ 907-րդ ուղղումը լիովին չեղյալ համարելու համար։
Էմմա Չոբանյան
