Ռուսական ԱԹՍ-ի հարվածի հետևանքով Լեհաստանում բնակելի տուն է վնասվել

Լեհաստանում ռուսական անօդաչու թռչող սարքը հարվածել է Լյուբլինի վոյեվոդության Վիրիկի քաղաքում (Վլոդավսկի շրջան) բնակելի տան։ Վնասվել է տանիքը և տարածքում կայանված մեքենան, գրում է Polsat News-ը։ Լյուբլինի մարզային ոստիկանության շտաբի փոխտեսուչ Անջեյ Ֆիյոլեկը տեղեկացրել է, որ ոչ ոք չի տուժել։

Վլոդավա շրջանի քաղաքապետ Մարիուշ Զանկոն ասել է․ «Վիրիկի գյուղում տեղի է ունեցել միջադեպ, որտեղ վնասվել է բնակելի տուն։ Մենք դեռևս ճշգրիտ մանրամասները չգիտենք. չգիտենք՝ արդյոք անօդաչու թռչող սարքն է ընկել շենքի վրա և վնասել տանիքն ու առաստաղը, թե՞ դա անօդաչու թռչող սարքի բեկորներ են։ Ինչքան ես տեղյակ եմ բնակիչներից, մարդիկ լսել են պայթյունի ձայն և տեսել են նաև լեհական կործանիչներ։ Իրավիճակը բավականին դժվար է և մտահոգիչ. բնակիչների շրջանում իսկապես մեծ մտահոգություն կա»։

Տեղական ինքնակառավարման մարմնի պաշտոնյան հաստատել է, որ միջադեպի հետևանքով ոչ ոք չի տուժել, սակայն պատճառվել է գույքային վնաս: Շրջանի պաշտոնյաները տեղում են՝ վնասը գնահատելու համար։

Հավելենք, որ Լեհաստանի բանակի օպերատիվ հրամանատարությունը ավելի վաղ հայտնել էր, որ Ռուսաստանի Դաշնության կողմից Ուկրաինայի տարածքի վրա հարձակման ընթացքում խախտվել է նաև Լեհաստանի օդային տարածքը։  Հաղորդվել էր ԱԹՍ-ների խոցման մասին։

Լեհաստանի վարչապետ Դոնալդ Տուսկը X-ում գրել է, որ  Լեհաստանի օդային տարածքը «խախտվել է մեծ թվով ռուսական անօդաչու թռչող սարքերի կողմից»։

«Անմիջական սպառնալիք ներկայացնող անօդաչու թռչող սարքերը խոցվել են։ Ես մշտական ​​կապի մեջ եմ ՆԱՏՕ-ի գլխավոր քարտուղարի և մեր դաշնակիցների հետ», – հավելել է նա՝ չնշելով խոցված անօդաչու թռչող սարքերի ճշգրիտ թիվը։

Ուկրաինայի ռազմաօդային ուժերը և երկրի նախագահ Վլադիմիր Զելենսկին պնդում են, որ առնվազն ութ ռուսական ԱԹՍ հատել է Ուկրաինայի պետական ​​սահմանը  Լեհաստանի ուղղությամբ։