03.11.2026 | 23:29
Թրամփը հայտարարել է, որ ԱՄՆ-ը կդադարեցնի Իսրայելին տարեկան 4 միլիարդ դոլարի օգնության տրամադրումը
ՀՀ-ի ու Ադրբեջանի հայտը քննարկվում է․ Հնդկաստանը հերքում է Բաքվի մեղադրանքները ՇՀԿ-ին անդամակցությանը խոչընդոտելու մասին
Քաղաքականություն
05.09.2025 | 18:09
Հնդկաստանը հերքել է Շանհայի համագործակցության կազմակերպությանը (ՇՀԿ) իր անդամակցությունը խոչընդոտելու մասին Ադրբեջանի մեղադրանքները Չինաստանի Տյանցզին քաղաքում վերջերս կայացած գագաթնաժողովի ժամանակ՝ բացատրելով, որ անդամ պետությունները չեն կարող որոշում կայացնել ժամանակային սահմանափակումների պատճառով։
Հնդկաստանի ԱԳՆ-ն հայտարարել է, որ և՛ Հայաստանը, և՛ Ադրբեջանը դիմել են ՇՀԿ անդամակցության համար: «Ժամանակի սղության պատճառով անդամ պետությունները չեն կարողացել որոշում կայացնել այս հարցի վերաբերյալ Թիենծինում: Հարցը շարունակում է քննարկվել խմբի կողմից», – ասել է ԱԳՆ խոսնակ Ռանդհիր Ջայսվալը:
ՇՀԿ գագաթնաժողովի ավարտից հետո Ադրբեջանը հայտարարել էր, որ Հնդկաստանը խոչընդոտել է իր անդամակցությանը, ադրբեջանական որոշ աղբյուրներ էլ նշել էին, թե Պակիստանը խոչընդոտել է Հայաստանի անդամակցությանը ՇՀԿ-ին, չնայած երկու երկրներն էլ վերջապես դիվանագիտական հարաբերություններ են հաստատել։
Այսօր ավելի վաղ ադրբեջանական իշխանամերձ APA գործակալությունը, վկայակոչելով դիվանագիտական աղբյուրներից ստացված տեղեկատվությունը, հայտնել էր, որ ՇՀԿ-ին Ադրբեջանի անդամակցության արգելափակումը նախաձեռնել է ոչ միայն Հնդկաստանը, Ռուսաստանը ևս ակտիվորեն մասնակցել է այդ գործընթացին։ Ռուսաստանի Դաշնության ԱԳՆ-ն առանցքային դերակատարում է ունեցել այդ գործընթացում։
Աղբյուրի փոխանցմամբ՝ Ռուսաստանի և Հնդկաստանի միջև քաղաքական խորհրդակցությունների ժամանակ քննարկվել է ՇՀԿ-ին Ադրբեջանի անդամակցությունը խոչընդոտելու հարցը, և կողմերը հասել են համապատասխան համաձայնության։ Սակայն Ռուսաստանը Հնդկաստանին առաջնային պլան է մղել՝ մնալով ստվերում։
Թարգմանությունը՝ Էմմա Չոբանյանի
