Հնդկաստանն արգելափակել է Ադրբեջանի անդամակցությունը ՇՀԿ-ին

Հնդկաստանը կրկին արգելափակել է Շանհայի համագործակցության կազմակերպությանը լիիրավ անդամակցության մասին Ադրբեջանի դիմումը։ Այս մասին հայտնում է ադրբեջանական AnewZ-ը։

Չինաստանը վերահաստատել է իր աջակցությունը Շանհայի համագործակցության կազմակերպության (ՇՀԿ) լիիրավ անդամ դառնալու՝ Ադրբեջանի դիմումին։

Իրավիճակին  ծանոթ պաշտոնյաները նշել են, որ Հնդկաստանի որոշումը՝ խոչընդոտելու գործընթացը, հակասում է բազմակողմ դիվանագիտության սկզբունքներին և «Շանհայի ոգուն», որոնք սահմանում են, որ երկկողմ վեճերը չպետք է տեղափոխվեն բազմակողմ հարթակներ։ Տեղեկությունների համաձայն՝ Հնդկաստանի դիրքորոշումը սերտորեն կապված է Ադրբեջանի և Պակիստանի եղբայրական հարաբերությունների հետ։

Հաղորդվում է, որ այս քայլը «չի փոխում Ադրբեջանի կուրսը», այլ միջազգային հանրությանը ցույց է տալիս «Հնդկաստանի քաղաքականության սահմանափակ և կարճատես բնույթը»։

Միաժամանակ, ըստ ադրբեջանական աղբյուրի, Պակիստանի՝ Հայաստանի հետ դիվանագիտական ​​հարաբերություններ հաստատելու վերաբերյալ վերջերս ընդունված որոշումը համաձայնեցվել է Բաքվի հետ։

Չինաստանի նախագահ Սի Ցզինպինը նախօրեին ընդգծել էր, որ Պեկինն աջակցում է Հայաստանի և Ադրբեջանի՝ ՇՀԿ-ին որպես մշտական ​​անդամներ միանալուն։ Ներկայում երկրներն ունեն Շանհայի համագործակցության կազմակերպության երկխոսության գործընկերոջ կարգավիճակ։

Ադրբեջանական լրատվամիջոցները գրում են, որ Ադրբեջանը ՇՀԿ-ում նոր գործընկերոջ կարգավիճակ կստանա։

Շանհայի համագործակցության կազմակերպությունը (ՇՀԿ) որոշել է ստեղծել միասնական կարգավիճակ՝ «ՇՀԿ գործընկեր» անվամբ, ասվում է ՇՀԿ անդամ պետությունների «Տյանցզինի հռչակագրում»։ Ընդունված հայտարարության մեջ նշվում է, որ անդամ պետությունները «դիտորդ» և «երկխոսության գործընկեր» կարգավիճակները միավորել են նոր կարգավիճակի՝ «ՇՀԿ գործընկերոջ»։

Թարգմանությունը՝ Էմմա Չոբանյանի