Քաղաքականություն
03.09.2025 | 18:23
Գերմանիայի կանցլեր Ֆրիդրիխ Մերցը Ռուսաստանի նախագահ Վլադիմիր Պուտինին անվանել է «հնարավոր է՝ մեր ժամանակների ամենավտանգավոր ռազմական հանցագործը»։
«Նա ռազմական հանցագործ է»,- հայտարարել է Գերմանիայի կառավարության ղեկավարը Sat1 հեռուստաալիքին տված հարցազրույցում, գրում է DW-ի ռուսական ծառայությունը։
Մերցի խոսքով՝ Ռուսաստանի նախագահը ներկայում որևէ պատճառ չի տեսնում համաձայնելու հրադադարի կամ, առավել ևս, Ուկրաինայի հետ խաղաղության համաձայնագիր կնքելուն։
«Մենք պետք է դրա համար հիմքեր ստեղծենք։ Ռազմական առումով դա դժվար կլինի, բայց տնտեսական առումով՝ բավականին հնարավոր»,- ընդգծել է Մերցը։
Նա ասել է, որ խոսքը Ռուսաստանին տնտեսապես «հյուծելու» մասին է, նրան զրկելու իր ռազմական մեքենան պահելու հնարավորությունից։ Մերցի կարծիքով՝ դա կարելի է անել, օրինակ, Ռուսաստանի հետ առևտուրը շարունակող երկրների նկատմամբ մաքսատուրքեր սահմանելով։
Միևնույն ժամանակ, Գերմանիայի կանցլերը հավելել է, որ «չի տեսնում որևէ պատճառ՝ հավատալու Պուտինի որևէ հայտարարության»։ Նա նաև կարծիք է հայտնել, որ Ռուսաստանի նախագահի հետ բանակցություններում զիջումներն անտեղի են։
Գերմանիայի կանցլերը կարծում է, որ Ուկրաինայի և Ռուսաստանի նախագահներ Վլադիմիր Զելենսկիի և Վլադիմիր Պուտինի միջև ուղիղ բանակցությունները կարող են տեղի ունենալ Շվեյցարիայում:
«Ժնևը հարմար վայր կլինի հրադադարի համաձայնագիր կնքելու համար»,- Շվեյցարիայի նախագահ Կարին Քելլեր-Զուտտերի հետ համատեղ մամուլի ասուլիսում ասել էր Մերցը:
Վերջինը հաստատել է, որ Շվեյցարիայի իշխանությունները պատրաստ են հյուրընկալել նման գագաթնաժողովը:
ԱՄՆ նախագահ Դոնալդ Թրամփն էր օգոստոսին երկու առաջնորդների հետ հանդիպումներից հետո խոսել Պուտինի և Զելենսկիի միջև երկկողմ հանդիպման նախապատրաստական աշխատանքների մասին։ Սակայն ավելի ուշ նա խոստովանել էր, որ Ռուսաստանի, Ուկրաինայի և ԱՄՆ-ի միջև եռակողմ բանակցություններն ավելի հավանական են։
Գերմանիայի կանցլերը վերջերս «վատ» արտահայտություններ է արել Ռուսաստանի նախագահ Վլադիմիր Պուտինի հասցեին, այդ պատճառով էլ չպետք է հաշվի առնել նրա կարծիքը ռուս-ուկրաինական հակամարտության վերաբերյալ, Մերցի հայտարարություններն այսպես է մեկնաբանել Ռուսաստանի նախագահի մամուլի քարտուղար Դմիտրի Պեսկովը։
Թարգմանությունը՝ Էմմա Չոբանյանի
