03.11.2026 | 23:29
Թրամփը հայտարարել է, որ ԱՄՆ-ը կդադարեցնի Իսրայելին տարեկան 4 միլիարդ դոլարի օգնության տրամադրումը
Թրամփը հայտնել է, որ ԱՄՆ-ը հարվածել է վենեսուելական նավի և սպանել 11 «թմրաահաբեկիչների»․ ՏԵՍԱՆՅՈՒԹ
Քաղաքականություն
03.09.2025 | 14:13
ԱՄՆ նախագահ Դոնալդ Թրամփը հայտարարել է, որ ամերիկյան ուժերը հարձակվել են Միացյալ Նահանգներ թմրանյութեր տեղափոխող նավակի վրա՝ սպանելով 11 «թմրաահաբեկիչների», որոնք պատկանում էին այն խմբավորմանը, որը, նրա պնդմամբ, վերահսկվում է Վենեսուելայի ձախակողմյան առաջնորդ Նիկոլաս Մադուրոյի կողմից, գրում է France 24-ը։
Թրամփը համացանցում տեսանյութ է հրապարակել, որտեղ երևում է ջրային տարածքով մի քանի մարդկանց տեղափոխող բաց մոտորանավակը՝ նախքան այն պայթելը և կրակի գնդի վերածվելը։
Այս քայլը Կարակասի և Վաշինգտոնի միջև առճակատման պոտենցիալ սրացում է, այն բանից հետո, երբ Միացյալ Նահանգները ռազմանավեր է տեղակայել հարավային Կարիբյան ավազանում՝ դա թմրանյութերի ապօրինի շրջանառության դեմ պատերազմ անվանելով։
Թրամփը սկզբում Սպիտակ տանը հայտարարել է, որ ԱՄՆ ուժերը «կրակել են թմրանյութեր տեղափոխող նավակի վրա, որում շատ թմրանյութ է եղել»՝ առանց մանրամասներ հաղորդելու։ Ավելի ուշ նա Truth Social ցանցում հրապարակել է հարվածի մասին հայտարարություն՝ պայթող նավակի սև-սպիտակ տեսանյութի ուղեկցությամբ։
«Այսօր առավոտյան, իմ հրամանով, ԱՄՆ զինված ուժերը կինետիկ հարված են հասցրել «Տրեն դե Արագուա»-ի թմրաահաբեկիչներին։ Հարվածը տեղի է ունեցել այն ժամանակ, երբ ահաբեկիչները ծովում էին՝ միջազգային ջրերում, և տեղափոխում էին անօրինական թմրանյութեր՝ ուղևորվելով դեպի Միացյալ Նահանգներ։ Հարվածի հետևանքով զոհվել է 11 ահաբեկիչ»,- գրել է Թրամփը՝ հավելելով, որ ԱՄՆ զինված ուժերից ոչ ոք չի տուժել։
Նա պնդել է, որ «Տրեն դե Արագուա» վենեսուելական խումբը «գործում է Նիկոլաս Մադուրոյի վերահսկողության ներքո»։ ԱՄՆ-ն այս տարեսկզբին խմբավորումը որակել էր որպես ահաբեկչական կազմակերպություն։
«Թող սա որպես նախազգուշացում ծառայի նրանց համար, ովքեր նույնպես մտածում են թմրանյութեր ներմուծել Ամերիկայի Միացյալ Նահանգներ։ ԶԳՈՒՇԱՑԵ՛Ք»,- հավելել է Թրամփը։
ԱՄՆ պետքարտուղար Մարկո Ռուբիոն, որը Մադուրոյի խիստ քննադատն է, առանձին խոստացել է շարունակել օգտագործել Միացյալ Նահանգների «ամբողջական հզորությունը»՝ թմրակարտելներն «արմատախիլ անելու» համար։
«Նախագահ Թրամփը շատ հստակ ասել է, որ օգտագործելու է Ամերիկայի ամբողջ հզորությունը՝ այս թմրակարտելների դեմ պայքարելու և դրանք արմատախիլ անելու համար, անկախ նրանից, թե որտեղից են նրանք գործում»,- լրագրողներին ասել է Ռուբիոն։
Ավելի վաղ նա X-ում նշել էր, որ նավը «մեկնել է Վենեսուելայից»։
Վենեսուելայի նախագահ Մադուրոն ԱՄՆ-ի զորքերի վերջին տեղակայումը որակել է որպես երկրի համար սպառնալիք։
Երեքշաբթի օրվա հարվածի մասին հայտարարությունը հաջորդել է Վաշինգտոնի և Կարակասի միջև լարվածության աճին, երբ Մադուրոն հայտարարել է «առավելագույն պատրաստվածության» վիճակի մասին՝ պաշտպանվելու, իր խոսքով,՝ ԱՄՆ ռազմական սպառնալիքներից։
Մադուրոն Թրամփի թիրախում է հայտնվել 2017-2021 թվականներին նրա նախագահության առաջին ժամկետից ի վեր։ Սակայն ԱՄՆ նախագահի առավելագույն ճնշման քաղաքականությունը, այդ թվում՝ նավթի էմբարգոն, չի կարողացել հեռացնել Վենեսուելայի առաջնորդին իշխանությունից։
Վաշինգտոնը կրկնապատկել է Մադուրոյին բռնելու համար նախատեսված պարգևը՝ այն հասցնելով 50 միլիոն դոլարի, որի վերընտրությունը 2024 և 2018 թվականներին չի ճանաչվել ո՛չ Միացյալ Նահանգների, ո՛չ էլ միջազգային հանրության մեծ մասի կողմից՝ ընտրախախտումների և ընտրողների նկատմամբ ճնշման մեղադրանքների պատճառով։
Վերլուծաբաններն էլ AFP-ին ասել են, որ ԱՄՆ ռազմանավերի տեղակայումը, հավանաբար, նպատակ ուներ ուժեղացնել ճնշումը Մադուրոյի վրա, որը բազմիցս մեղադրել է Թրամփին վենեսուելական իշխանության փոփոխություն իրականացնելու փորձերի մեջ։
Թարգմանությունը՝ Էմմա Չոբանյանի
