03.07.2026 | 01:00
ԱԱ-2026. Իսպանիան վստահ հաղթեց և 1/8 եզրափակիչում է. ՏԵՍԱՆՅՈՒԹ
Պուտինն ու Կիմ Չեն Ընը Պեկինում բանակցել են․ երկկողմ հանդիպումը տևել է 2,5 ժամ․ ՏԵՍԱՆՅՈՒԹ
Քաղաքականություն
03.09.2025 | 13:55
ՌԴ նախագահ Վլադիմիր Պուտինն ու Հյուսիսային Կորեայի առաջնորդ Կիմ Չեն Ընը Պեկինում բանակցություններ են անցկացրել։ ՏԱՍՍ-ի փոխանցմամբ՝ հանդիպումը տեղի է ունեցել Դյաոյուտայ համալիրի տարածքում, որը դարձել է Ռուսաստանի առաջնորդի նստավայրը Չինաստան կատարած այցի ընթացքում։
Պուտինն ու Կիմ Չեն Ընը սկսել են շփվել դեռևս բանակցություններից առաջ՝ Ճապոնիայի դեմ Դիմադրության պատերազմում չին ժողովրդի հաղթանակի 80-ամյակի և Երկրորդ համաշխարհային պատերազմի ավարտի պատվին կազմակերպված ընդունելության ժամանակ։ Այնտեղից առաջնորդները նույն մեքենայով մեկնել են Դյաոյուտայ նստավայր։
Հանդիպման մեկնարկին Կիմ Չեն Ընը նշել է, որ ուրախ է Պուտինի հետ խոսելու հնարավորության համար, մատնանշել երկրների միջև համագործակցության զարգացումն անցյալ տարի Համապարփակ ռազմավարական գործընկերության մասին պայմանագիրը ստորագրելուց հետո և խոստացել, որ ԿԺԴՀ-ն Ռուսաստանին կտրամադրի «եղբայրական» օգնություն։
Իր հերթին, Պուտինն ընդգծել է, որ Մոսկվայի և Փհենյանի միջև հարաբերությունները հատուկ բնույթ ունեն։ Նա նշել է, որ կորեացի զինվորականները քաջաբար և հերոսաբար կռվել են Կուրսկի շրջանում, որի մի մասը գրավվել է Ուկրաինայի զինված ուժերի կողմից։
«Ձեր նախաձեռնությամբ, ինչպես հայտնի է, ձեր հատուկ նշանակության ուժերը մասնակցել են Կուրսկի շրջանի ազատագրմանը՝ մեր նոր համաձայնագրի լիարժեք պահպանմամբ»,- ասել է Պուտինը։
Մի քանի օր առաջ ԿԺԴՀ-ի ղեկավարը հանդիպել էր զոհված հյուսիսկորեացի զինվորների հարազատների հետ և իր ցավակցություն հայտնել նրանց։ Մոսկվան և Փհենյանը չեն բացահայտում զոհվածների թիվը։
Կիմ Չեն Ընը Կուրսկի մարզում ռազմական գործողություններին մասնակցությունը ԿԺԴՀ-ի եղբայրական պարտքն է անվանել։
«Եթե Փհենյանը կարողանա որևէ կերպ օգնել Ռուսաստանին, ապա անպայման կանի դա. եղբայրական պարտականություն է՝ անել ամեն ինչ Ռուսաստանին օգնելու համար»,- հայտարարել է Կիմ Չեն Ընը։
Ավելի ուշ ռուսական լրատվամիջոցները հայտնել են, որ Վլադիմիր Պուտինի և Կիմ Չեն Ընի բանակցությունները տևել են ավելի քան 2,5 ժամ։
Պուտինը հյուսիսկորեացի գործընկերոջը Ռուսաստան է հրավիրել։
Թարգմանությունը՝ Էմմա Չոբանյանի
