Պուտինն ու Էրդողանը Չինաստանում հանդիպմանը կքննարկեն Կովկասյան տարածաշրջանը

Ռուսաստանի նախագահ Վլադիմիր Պուտինը սեպտեմբերի 1-ին կհանդիպի Թուրքիայի նախագահ Ռեջեփ Թայիփ Էրդողանի հետ Շանհայի համագործակցության կազմակերպության գագաթնաժողովի շրջանակում: Առաջնորդները կքննարկեն Ուկրաինայի և Մերձավոր Արևելքի խաղաղության հարցերը։ Այս մասին լրագրողների հետ ճեպազրույցում հայտարարել է Ռուսաստանի նախագահի միջազգային հարցերով օգնական Յուրի Ուշակովը, գրում է ՏԱՍՍ-ը։

«Մեր հնդիկ գործընկերոջից հետո նախատեսվում է զրույց Թուրքիայի նախագահ Ռեջեփ Թայիփ Էրդողանի հետ։ Առաջնորդները մշտական ​​կապի մեջ են, շատ են խոսում հեռախոսով, մենք անընդհատ հրապարակում ենք հեռախոսազրույցների մասին հաղորդագրություններ»,- ասել է Ուշակովը։

Նա ընդգծել է, որ սա այս տարի նախագահների առաջին անձնական հանդիպումը կլինի։

«Իհարկե, կքննարկվեն երկկողմ համագործակցության տարբեր հարցեր, ինչպես նաև միջազգային հարցեր։ Ամենայն հավանականությամբ, կքննարկվի Ուկրաինան»,- ասել է նա՝ հիշեցնելով, որ Թուրքիան կարևոր դեր է խաղում ուկրաինական հակամարտության քաղաքական և դիվանագիտական ​​լուծում գտնելու ջանքերում և Ստամբուլի հարթակ է տրամադրում ռուս-ուկրաինական ուղիղ բանակցությունների համար, որի համար Ռուսաստանի Դաշնությունը շնորհակալ է թուրքական իշխանություններին։

«Բացի այդ, իհարկե, մենք չենք կարող խուսափել քննարկումից Մերձավոր Արևելքում, Հյուսիսային Աֆրիկայում, Կովկասյան տարածաշրջանում սրված իրավիճակի մասին»,- ասել է Կրեմլի ներկայացուցիչը։

Հիշեցնենք, որ ՀՀ վարչապետ Նիկոլ Փաշինյանն օգոստոսի 30-ից սեպտեմբերի 3-ն աշխատանքային այցով կգտնվի Չինաստանում։ ՀՀ կառավարության փոխանցմամբ՝ այցի շրջանակում վարչապետը կմասնակցի ՇՀԿ գագանթաժողովի ՇՀԿ+ ձևաչափի հանդիպմանը և դրա շրջանակում կայանալիք միջոցառումներին: Նախատեսվում են մի շարք բարձր մակարդակի հանդիպումներ։

Թարգմանությունը՝ Էմմա Չոբանյանի