06.08.2026 | 19:53
Թուրքիայի պատգամավորները հավանություն են տվել PKK-ի զինյալների սահմանափակ համաներման մասին օրինագծին
Լեհաստանում ավիաշոուի փորձի ժամանակ F-16 կործանիչ է վթարի ենթարկվել. օդաչուն զոհվել է
Քաղաքականություն
29.08.2025 | 14:18
Radom միջազգային ավիաշոուի ուսումնական թռիչքի ժամանակ լեհ ռազմական օդաչու է մահացել։ Լեհաստանի տարածքային պաշտպանության ուժերը հայտնել են, որ զոհված օդաչուն լեհական բանակի սպա էր։ Նրա F-16 կործանիչը կորցրել է կառավարումը և վթարի ենթարկվել օդանավակայանի մոտակայքում, գրում է Euronews-ը։
Նախնական տվյալներով՝ F-16 կործանիչով մանևրի ժամանակ ինքնաթիռը հանկարծակի կորցրել է բարձրությունը և մեծ արագությամբ բախվել գետնին օդանավակայանի մոտակայքում։ Վթարից հետո ինքնաթիռը բռնկվել է։ Վթարի հետևանքների վերացման գործողությունն իրականացվել է օդանավակայանի հրշեջների և ՆԳՆ ենթակա ստորաբաժանումների մասնակցությամբ։
Վարշավայի շրջանային դատախազությունը հայտնել է, որ Պաշտպանության նախարարության քննչական խումբը և ռազմական ոստիկանության ներկայացուցիչները սկսել են նախնական քննչական գործողությունները։
Ներքին գործերի նախարարության մամուլի խոսնակ Կարոլինա Գալեցկան ընդգծել է, որ իրավիճակը մնում է անկայուն և օպերատիվ փոփոխվող, և բոլոր անհրաժեշտ ծառայությունները գտնվում են լիարժեք պատրաստության վիճակում։
«Լեհ օդաչուն մահացել է F-16-ի վթարի հետևանքով։ Հարգենք նրա հիշատակը։ Իմ խորին ցավակցությունները նրա ընտանիքին և սիրելիներին»,- X-ում գրել է Լեհաստանի վարչապետ Դոնալդ Տուսկը։
«Ես ստացա F-16 կործանիչի կործանման չափազանց տխուր լուրը, որի հետևանքով զոհվել է լեհ օդաչուն: Իմ անկեղծ ցավակցությունն եմ հայտնում նրա ընտանիքին և ընկերներին: Թող Աստված նրան հավերժական խաղաղություն պարգևի»,- իր հերթին նշել է նախագահ Կարոլ Նավրոցկին։
Wirtualna Polska-ի հաղորդմամբ՝ օգոստոսի 30-31-ը նախատեսված AirShow Radom միջազգային ավիաշոուն չեղարկվել է։ Այն իր տեսակի մեջ ամենամեծ միջոցառումն է Լեհաստանում և ամենահայտնիներից մեկը Եվրոպայում։ Այս տարի միջոցառմանը պետք է մասնակցեր ավելի քան 150 ինքնաթիռ 20 երկրներից, իսկ հանդիսատեսի թիվը կարող էր հասնել տասնյակ հազարների։
Կազմակերպիչները ցավակցություն են հայտնել և նշել, որ չեղարկման որոշումը կայացվել է մահացած օդաչուի հիշատակի նկատմամբ հարգանքից ելնելով։
Defence24-ի փորձագետ Մացեյ Շոպայի խոսքով՝ օդաչուն, հավանաբար, չի կատապուլտացվել։
«Ինքնաթիռը բավարար բարձրություն չուներ։ Պայթյունը ցույց է տալիս, որ այն լիքն է եղել վառելիքով»,- ասել է նա՝ չբացառելով տեխնիկական անսարքության, օդաչուի սխալի կամ գիտակցության կորստի հնարավորությունը։
Թարգմանությունը՝ Էմմա Չոբանյանի
