Լեհաստանի նախագահականը հայտնել է, որ չեն դադարեցնում Ուկրաինայի համար Starlink-ի ֆինանսավորումը

Լեհաստանի նախագահ Կարոլ Նավրոցկիի գրասենյակի ղեկավար Զբիգնև Բոգուցկին հայտարարել է, որ երկրի իշխանությունները չեն դադարեցնում Starlink արբանյակային ինտերնետի ֆինանսավորումն Ուկրաինայի համար, գրում է Current time-ը։

«Նախագահ Նավրոցկիի վետոն ՉԻ անջատում Starlink ինտերնետը Ուկրաինայի համար, քանի որ այս կապի ծախսերը ֆինանսավորվում են գործող օրենսդրության դրույթներին համապատասխան, և Լեհաստանի նախագահի կողմից Սեյմին ներկայացված օրինագիծը պահպանում է այս կարգը։ Նույնը վերաբերում է նաև Ուկրաինայի կառավարության տվյալներն անվտանգ վայրում պահելուն ուղղված աջակցությանը»,- գրել է նա։

Նախօրեին Լեհաստանի թվայնացման նախարար, փոխվարչապետ Քշիշտոֆ Գավկովսկին հայտարարել էր, որ Նավրոցկին վետո է դրել Ուկրաինայի քաղաքացիներին օգնություն տրամադրելու մասին օրենքի վրա, որը ներառում էր Starlink ինտերնետի վճարման համար օգնության հատկացումը։

«Սա Starlink ինտերնետի վերջն է, որը Լեհաստանը տրամադրում է Ուկրաինային պատերազմի ժամանակ: Սա նաև Ուկրաինայի վարչակազմի տվյալներն անվտանգ վայրում պահելու աջակցության վերջն է»,- նշել էր նա։

Զբիգնև Բոգուցկին իր գրառման մեջ հիշատակել է Գավկովսկուն և ասել, որ նա պետք է «պայքարի համացանցում մանիպուլյացիաների և ապատեղեկատվության դեմ, այլ ոչ թե ստեղծի դրանք»։

Օգոստոսի 25-ին Նավրոցկին հայտարարել էր, որ վետո է դրել խորհրդարանի կողմից հաստատված օրինագծի վրա, որը նախատեսում էր վճարումներ կատարել Լեհաստանում բնակվող ուկրաինացի փախստականների երեխաներին։ Լեհաստանի նախագահի կայքում առկա բացատրությունից հետևում է, որ Նավրոցկիին դուր չի եկել, որ նպաստ է վճարվել նաև այն ուկրաինացիներին, ովքեր չեն աշխատում Լեհաստանում։

Կիևը Starlink արբանյակային ինտերնետն օգտագործում է թե՛ ճակատում՝ ռազմական նպատակներով, թե՛ պետական ​​հատվածում։ Լեհաստանի արտաքին գործերի նախարար Ռադոսլավ Սիկորսկին ավելի վաղ գրել էր, որ «Ուկրաինայի համար Starlink ծառայությունների համար վճարում է Լեհաստանի թվայնացման նախարարությունը», ինչը տարեկան արժենում է  մոտ 50 միլիոն դոլար:

Թարգմանությունը՝ Էմմա Չոբանյանի