22.05.2026 | 23:50
Անդրանիկ Թևանյանի նկատմամբ հարուցվել է քրեական հետապնդում պետական դավաճանության հանցակազմի հատկանիշներով
Ուկրաինայի տարածքների զիջումը ՌԴ-ի կողմից պատրաստված «ծուղակ» է․ Կայա Կալլաս
Քաղաքականություն
22.08.2025 | 12:59
Եվրոպական դիվանագիտության ղեկավար Կայա Կալլասը հայտարարել է, որ ուկրաինական տարածքների վերաբերյալ Մոսկվայի պահանջները «ծուղակ է, որը Ռուսաստանը պատրաստել է մեզ համար»։
«Բոլոր խոսակցություններն այն մասին են, թե ինչ պետք է զիջի Ուկրաինան, ինչ զիջումների է պատրաստ գնալ Ուկրաինան։ Մինչդեռ մենք մոռանում ենք, որ Ռուսաստանը ոչ մի զիջում չի արել։ Եթե մենք ընկնենք այդ ծուղակը, եթե մենք ճնշում գործադրենք Ուկրաինայի վրա՝ զիջումներ անելու, ապա այս իրավիճակը կկրկնվի, քանի որ ագրեսիան կպարգևատրվի»,- BBC-ին տված հարցազրույցում հավելել է նա։
Եվրոպացի պաշտոնյայի խոսքով՝ Ռուսաստանի նախագահ Վլադիմիր Պուտինն Ալյասկայի գագաթնաժողովից «ստացել է այն ամենը, ինչ ուզում էր». նրան ընդունել են պատվով, և Սպիտակ տունը նոր պատժամիջոցներ չի կիրառել։
Կալլասը նաև մեկնաբանել է Ուկրաինայի անվտանգության երաշխիքների վերաբերյալ բանակցությունները՝ նշելով, որ այս փուլում քիչ «հստակ քայլեր» կան։
«Անվտանգության ամենահուսալի երաշխիքն ուժեղ ուկրաինական բանակն է»,- եզրափակել է նա։
Վաշինգտոնում Ուկրաինայի նախագահ Վլադիմիր Զելենսկիի ու եվրոպացի առաջնորդների մասնակցությամբ կայացած բանակցություններից հետո մի քանի երկրներ առաջարկ են պատրաստում, թե ինչպիսին կարող են լինել Կիևի անվտանգության երաշխիքները։
ՌԴ արտաքին գործերի նախարար Սերգեյ Լավրովն արդեն հայտարարել է, որ արևմտյան զորքերի տեղակայումն Ուկրաինայում «անընդունելի է Ռուսաստանի համար»։
