Կամո Արեյանն ազատվել է քաղաքապետի առաջին տեղակալի պաշտոնից. «բարիկադները քանդում ենք» կարգախոսի ներքո նոր պաշտոն կստանա

Կամո Արեյանն այլևս Երևանի քաղաքապետի առաջին տեղակալը չէ: Այս մասին Factor.am-ի հարցին ի պատասխան ասաց Երևանի քաղաքապետարանի լրատվության բաժին ժամանակավոր պատասխանատու Տարոն Գևորգյանը:

Հարցին, թե Արեյանը, երբ է ազատվել քաղաքապետի առաջին տեղակալի պաշտոնից, Գևորգյանը փոխանցեց. «Կամո Արեյանը քաղաքապետի առաջին տեղակալը չէ երկուշաբթի օրվանից»:

Factor.am-ի հարցին՝ արդյո՞ք Կամո Արեյանն այլ պաշտոն զբաղեցնելու է քաղաքապետարանում, լրատվության պատասխանատուն արձագանքեց՝ երբ պաշտոնական տեղեկատվություն լինի՝ կհրապարակենք:

Factor.am-ին հայտնի դարձավ, որ «Քաղաքացիական պայմանագիր» կուսակցությունում, այնուհանդերձ,  քննարկում է եղել Արեյանին քաղաքապետարանում պահելու հարցով: ՔՊ-ականները եկել են այն եզրահանգման, որ Արեյանը շատ գիտելիքներ ունի և կարող է նորաթուխ քաղաքապետ Հայկ Մարությանին և նրա անփորձ թիմին պետք գալ: ՔՊ-անդամներից մեկը մեզ հետ ունեցած մասնավոր զրույցում տեղեկացրեց, որ Արեյանին քաղաքապետարանում պահելու են «բարիկադները քանդում ենք» կարգախոսի ներքո:

Առայժմ անհայտ է, թե Արեյանին ով է փոխարինելու: Մամուլը շրջանառել էր ՔՊ-ական, ավագանու անդամ Վահագն Հովակիմյանի անունը, սակայն, նա այսօր հերքեց այդ տեղեկությունները՝ ավելացնելով, որ ավագանու մանդատը վայր դնելու դիմում է ներկայացրել: Հովակիմյանը մասնակցելու է խորհրդարանական արտահերթ ընտրություններին:

Հավելենք, որ մի քանի օր է՝ Կամո Արեյանը չի պատասխանում մեր հեռախոսազանգերին: Ի դեպ, նա Երևանի քաղաքապետի առաջին տեղակալի պաշտոնը զբաղեցնում էր 2003 թվականից՝ ավելի քան 15 տարի:

Ա․ Սահակյան