ԿԲ փոխնախագահը՝ Arca համակարգի խափանման պատճառների մասին

Arca համակարգում օրեր առաջ նկատված խափանումները եղել են սարքի խափանման հետևանք:  Այս մասին ասուլիսի ժամանակ ասել է Կենտրոնական բանկի փոխնախագահ Արմեն Նուրբեկյանը: Նրա խոսքով՝ Arca վճարահաշվարկային համակարգի անխափան աշխատանքի հետ կապված ՀՀ կենտրոնական բանկն ուսումնասիրություններ է արել, որոնք շարունակական են։

«Դա շատ մեծ հեղինակություն ունեցող արտասահմանյան ընկերության կողմից տրամադրվող սարք է: Հիմա փաստացի հետազոտություններ են անում, նաև մասնագետներ են հրավիրել, որպեսզի հասկանան, թե ինչով է դա պայմանավորված եղել»,-  նշել է Նուրբեկյանը:

ԿԲ փոխնախագահի խոսքով՝ Կենտրոնական բանկը, անկախ Arca-ի հայտարարություններից, իր վերահսկողության շրջանակներում դեռևս 2022 թվականից ունի վերահսկողական որոշակի ռեկոմենդացիաներ անընդհատության տեսանկյունից և հետամուտ է լինելու, որ դրանք կատարվեն:

«Մեծ մասը կատարվել է, որոշակի բաներ կան, որոնց ուղղությամբ պետք է Arca-ի հետ աշխատենք, որ շարունակի կատարել։ Մենք պետք է ամեն ինչ անենք, որ այդ խափանումները լինեն ավելի կառավարելի: Դա խնդիր է, որ պետք է լուծենք»,- շեշտել է Նուրբեկյանը:

Նրա խոսքով՝ Հայաստանում անկանխիկի ծավալներն անգամներով աճել են, որի արդյունքում աճել է նաև համակարգերի ծանրաբեռնվածությունը։

Հիշեցնենք, որ հուլիսին երկու անգամ խափանվել էր Arca համակարգը, որի պատճառով մարդիկ չէին կարողանում անկանխիկ գործարքներ իրականացնել։ Arca-ից պարզաբանել էին, որ 2025թ․ հուլիսի 23-ի 10։05-16։50 ընկած ժամանակահատվածում արձանագրված խափանումը առաջացել է հավաստագրման համակարգի թարմացման տեղադրումից որոշ ժամանակ անց և պայմանավորված է եղել տեխնիկական բնույթի խոչընդոտներով։

Հաղորդվել էր, որ 2025թ․ հուլիսի 29-ին ժամը 11:46-ից մինչև 15։25 ևս արձանագրվել է խափանում նույն պատճառով, որը ժամանակավորապես ազդել է ընկերության կողմից մատուցվող բոլոր տեսակի ծառայությունների հասանելիության վրա։