07.03.2026 | 15:35
NYMEX․ Ոսկու գինն աճել է 1.60%-ով և կազմել 5146.10 դոլար
Փաշինյանը կառավարության շենքում կհանդիպի փորձագետների հետ
Քաղաքականություն
05.08.2025 | 15:51
Factor.am-ի տեղեկություններով՝ արձակուրդում գտնվող ՀՀ վարչապետ Նիկոլ Փաշինյանը կառավարության շենքում կհանդիպի մի խումբ փորձագետների հետ։
Ավելի վաղ ադրբեջանական մեդիա տիրույթում տեղեկություններ էին տարածվել այս շաբաթվա վերջում Վաշինգտոնում Փաշինյան-Ալիև հնարավոր հանդիպման մասին։
Ադրբեջանցի լրագրող Ալեքս Ռաուֆօղլունը հայտնել էր, որ ԱՄՆ նախագահ Դոնալդ Թրամփը Սպիտակ տանը կընդունի Հայաստանի և Ադրբեջանի ղեկավարներին։
Փաշինյանի աշխատկազմն էլ ԱՄՆ կատարելիք այցի մասին մամուլում և սոցիալական ցանցերում շրջանառվող տեղեկատվությունը ո՛չ հերքել էր, ո՛չ՝ հաստատել։
«Նման այցերի պարագայում, բնականաբար, լինում է պաշտոնական հաղորդագրություն, և տեղեկատվությունը հաստատված կարելի է համարել պաշտոնական հաղորդագրության պարագայում։ Այս պահին, ինչպես գիտեք, պաշտոնական որևէ հաղորդագրություն չենք հրապարակել և, հետևաբար, այցի մասին տեղեկատվությունը խնդրում ենք հաստատված համարել միայն պաշտոնական հաղորդագրությունից հետո», – տեղեկացրել էին վարչապետի աշխատակազմից։
Այսօր էլ, Middle East Eye պարբարեկանը, հղում անելով իրավիճակին ծանոթ տարածաշրջանային իր աղբյուրներին, գրել է, որ Հայաստանը և Ադրբեջանը ուրբաթ Վաշինգտոնում կստորագրեն փոխըմբռնման հուշագիր՝ պարտավորվելով հետամուտ լինել խաղաղության հաստատմանը։ Այս տեղեկությանը պաշտոնական Երևանը դեռ չի արձագանքել։
Նշենք նաև, որ Նիկոլ Փաշինյանը հուլիսի 28-ից օգոստոսի 15-ը արձակուրդում է։
Մանյա Պողոսյան
