12.01.2026 | 21:26
Չաբի Ալոնսոն հեռացվեց «Ռեալից»
Ուկրաինայում Թուրքիայի դեսպանը հերքել է լուրը, որ առաջիկա օրերին Էրդողանը Կիև կայցելի
Քաղաքականություն
05.08.2025 | 14:07
Ուկրաինայում Թուրքիայի դեսպան Նարիման Ջելյալը հայտարարել է, որ իրականությանը չի համապատասխանում տեղեկությունը, որ Թուրքիայի նախագահ Ռեջեփ Թայիփ Էրդողանն առաջիկա օրերին կժամանի Կիև՝ Ուկրաինայի նախագահ Վլադիմիր Զելենսկիի հրավերով։ Այս մասին գրում է «Украинская правда»-ն, որին վկայակոչում է BBC-ի ռուսական ծառայությունը։
Turkiye Gazetesi-ն հաղորդել էր, որ Ջեյլալը հայտարարել է, թե Էրդողանը շուտով կայցելի Կիև, և բանակցությունների ամենակարևոր թեմաներից մեկը կլինի ազատ առևտրի համաձայնագրի վավերացումը: Լրատվամիջոցի տվյալներով՝ առաջնորդները կքննարկեն Թուրքիայի ջանքերը՝ խաղաղ կարգավորման հասնելու համար։
«Украинская правда»-ին տված մեկնաբանության մեջ Ջելյալն ասել է, որ տեղեկատվությունը չի համապատասխանում իրականությանը։
«Պարբերականը, մեղմ ասած, աղավաղել է տեղեկատվությունը։ Խնդրում եմ ուշադրություն դարձնել, որ նրանք հղումներ չեն տրամադրում, որտեղ ես սա ասել եմ, չեն տրամադրում իմ մեջբերումը, պարզապես ասում են, որ ես, իբր, հայտարարել եմ այդ մասին»,- ասել է դեսպանը։
Ավելի վաղ հաղորդվել էր, որ Թուրքիայի դեսպանը հայտարարել է, թե Ուկրաինան պատրաստվում է Էրդողանի այցին, որի առանցքային թեման կարող է լինել երկրների միջև ազատ առևտրի մասին համաձայնագրի վավերացումը։
Թարգմանությունը՝ Էմմա Չոբանյանի
