Քաղաքականություն
04.08.2025 | 14:06
Ուկրաինան պատրաստվում է Թուրքիայի նախագահ Ռեջեփ Թայիփ Էրդողանի այցին։ Այցի առանցքային թեման կարող է լինել երկրների միջև ազատ առևտրի մասին համաձայնագրի վավերացումը։ Այս մասին հայտարարել է Թուրքիայում Ուկրաինայի դեսպան Նարիման Ջելյալը ՌԲԿ Ուկրաինային տված հարցազրույցում։
Նրա խոսքով՝ ուկրաինական կողմն այժմ ակտիվորեն աշխատում է Թուրքիայի նախագահ Ռեջեփ Թայիփ Էրդողանի Կիև այցը կազմակերպելու ուղղությամբ։ Ուկրաինայի նախագահ Վլադիմիր Զելենսկին անձնական հրավեր է փոխանցել Էրդողանին և, ըստ դիվանագետի, ինքը հաստատել է այդ հրավերը թուրք առաջնորդի հետ վերջերս կայացած հանդիպման ժամանակ։
«Այս այցը պահանջում է զգալի ջանքեր, քանի որ կան բազմաթիվ խնդիրներ, որոնք խոչընդոտում են դրա իրականացմանը»,- ասել է դեսպանը։
Նա նաև նշել է, որ այցի հիմնական թեման կարող է լինել Ուկրաինայի և Թուրքիայի միջև ազատ առևտրի մասին համաձայնագրի վավերացումը։ Այս փաստաթուղթը կարևոր է ինչպես ռազմավարական գործընկերության, այնպես էլ ուկրաինական բիզնեսի համար։
«Նախագահ Զելենսկիի հրավերը շատ պարզ է. Թուրքիան հետաքրքրված է ազատ առևտրի համաձայնագրի ստորագրմամբ։ Համաձայնագիրը կարևոր է նաև մեր բիզնեսի զգալի մասի համար, չնայած որոշների համար այն կարող է լարվածություն ստեղծել մրցակցության աճի պատճառով։ Այնուամենայնիվ, սա քաղաքական որոշում է։ Նախագահ Զելենսկին առաջարկել է վավերացնել այս համաձայնագիրը Էրդողանի այցի ժամանակ, ինչը լավ և խորհրդանշական քայլ կլիներ»,- ասել է Ջելյալը։
Լրատվամիջոցը հիշեցնում է, որ Եվրամիությունը ժամանակավորապես չեղյալ է հայտարարել ուկրաինական գյուղատնտեսական արտադրանքի մաքսատուրքերն ու քվոտաները 2022 թվականի հունիսին՝ Ռուսաստանի լայնածավալ ներխուժումից հետո։ Քվոտաները չեղյալ են հայտարարվել, քանի որ ռուսները սպառնում էին Ուկրաինայի ավանդական ծովային առևտրային ուղիներին։
Ըստ Ազգային վիճակագրական ծառայության գնահատականների՝ արտահանման զուտ կորուստները, հաշվի առնելով քվոտաներից բարձր շարունակական առևտուրը և հունիս-դեկտեմբեր ամիսներին այլ երկրների շուկաներ վերակողմնորոշելը, կկազմեն մոտ 800 միլիոն դոլար։
Թարգմանությունը՝ Էմմա Չոբանյանի
