Համայնքային ոստիկանության Արմավիրի բաժնում ստացվել էր օպերատիվ տեղեկություն, որ Արևիկ գյուղի բնակչ 53-ամյա մի տղամարդ հողամասում աճեցնում է կանեփ ու նաև ապօրինի պահում է թմրամիջոց։ Այս մասին հայտնում է ՆԳՆ ոստիկանությունը։
«Հուլիսի 30-ին մինչ համայնքային ոստիկանները կհասնեին սեփականաշնորհված հողամաս` ճանապարհին նկատեցին մի երիտասարդի, որը կանեփի բույսեր ձեռքին վազում էր։ Ժամը 14.35-ին նա ձերբակալվել է և տեղափոխվել բաժին: Պարզվել է, որ փախչողը 53-ամյա տղամարդու որդու ընկերն է: Կանեփի կիսաչոր բույսերը կշռում էին մոտ 12 կիլոգրամ։ Ժամը 15-ին ձերբակալվել ու բաժին է տեղափոխվել նաև 53-ամյա տղամարդը:
Նա հայտնել է, որ կիսաչոր կանեփն իրենն է` անձնական օգտագործման համար։ Ըստ նախնական տեղեկության` հենց նա էր որդու ընկերոջը խնդրել կանեփի թփերը տեղափոխել ու պահել այլ վայրում: Տղամարդը, նրա որդու 24-ամյա ընկերն ու կազմված փաստաթղթերը ներկայացվել են Արմավիրի մարզային քննչական վարչություն։ Նախաքննությամբ հանգամանքները պարզվում են»,- նշված է ոստիկանության հաղորդագրության մեջ:
