02.04.2026 | 20:45
Արցախցիները «փախե՞լ են» պատերազմից ու հայրենիքից․ Փաշինյանի խոսույթն ու հակադարձումները․ ՏԵՍԱՆՅՈՒԹ
ՄԻՊ-ն ու ՄԱԿ-ի Երեխայի իրավունքների կոմիտեի փոխնախագահը քննարկել են երեխայի իրավունքների ոլորտում առկա մարտահրավերները
Հասարակություն
29.07.2025 | 19:37
ՀՀ մարդու իրավունքների պաշտպան Անահիտ Մանասյանը հուլիսի 29-ին հանդիպել է ՄԱԿ-ի Երեխայի իրավունքների կոմիտեի փոխնախագահ Ֆիլիպ Ջաֆֆեի հետ։ Այս մասին տեղեկացնում են ՄԻՊ աշխատակազմից՝ նշելով, որ քննարկման ընթացքում կողմերն անդրադարձել են ոլորտում առկա մի շարք հիմնարար և հրատապ խնդիրների։
«Հանդիպման ընթացքում Պաշտպանը ներկայացրել է երեխաների իրավունքների ոլորտում ՄԻՊ հաստատության կողմից իրականացվող ծրագրերն ու առաջնահերթ ուղղությունները։ Անահիտ Մանասյանը հատուկ ընդգծել է, որ երեխաների իրավունքների պաշտպանությունն ու խթանումը մշտապես գտնվում են իր ուշադրության կենտրոնում՝ չնայած ոլորտում առկա մարտահրավերներին:
Քննարկվել են երեխայի իրավունքների ոլորտում առկա մարտահրավերները, ընդգծվել է դրանք հաղթահարելու համար երեխաների հետ աշխատող մասնագետների կարողությունների շարունակական զարգացման անհրաժեշտությունը։
Իր խոսքում Պաշտպանը կարևորել է մարդու իրավունքների պաշտպանության ոլորտում միջազգային համագործակցության ընդլայնումն ու գործընկերության խորացումը։ Այս համատեքստում քննարկվել են համագործակցության մի շարք առանցքային ուղղություններ։
Իր հերթին Ֆիլիպ Ջաֆֆեն բարձր է գնահատել երեխայի իրավունքների ոլորտում ՀՀ մարդու իրավունքների պաշտպանի հաստատության գործունեությունը՝ ընդգծելով շարունակական գործընկերային համագործակցության և համատեղ ջանքերի խորացման պատրաստակամությունը։
Հանդիպումից հետո տեղի է ունեցել քննարկում ՄԻՊ աշխատակազմի, ինչպես նաև Մարդու իրավունքների պաշտպանին առընթեր երեխաների իրավունքների պաշտպանության հարցերով հասարակական խորհրդի ներկայիս և նախկին անդամների մասնակցությամբ։
Քննարկման ընթացքում կողմերն անդրադարձել են ոլորտում առկա մի շարք հիմնարար և հրատապ խնդիրների՝ այդ թվում՝ ՄԱԿ-ի Երեխայի իրավունքների կոնվենցիայի արդյունավետ կիրառման խոչընդոտներին, երեխաների իրավունքների վերաբերյալ իրազեկվածության պակասին, ոլորտում մասնագիտական կարողությունների զարգացման անհրաժեշտությանը, կրթության իրավունքի իրացման սահմանափակումներին, հավասար հնարավորությունների ապահովման հարցերին, ինչպես նաև բուլինգի և խտրականության դրսևորումներին։
Հասարակական խորհրդի անդամները ներկայացրել են իրենց հուզող հարցերն ու առաջարկությունները՝ կարևորելով ոլորտում համակարգված բարեփոխումների անհրաժեշտությունն ու համագործակցության շարունակականության ապահովումը»,- ասված է հաղորդագրությունում։
