Ուկրաինական ԱԹՍ-ները Ռոստովի մարզում հարվածել են երկաթուղային կայարանի. ՏԵՍԱՆՅՈՒԹ

Ռոստովի մարզում ուկրաինական  անօդաչու թռչող սարքերը հարձակվել են Կամենսկ-Շախտինսկի, Սալսկի, Վոլգոդոնսկի, ինչպես նաև՝ Բոկովսկի և Տարասովսկի շրջանների վրա։ Այս մասին  հայտարարել է մարզի նահանգապետ Յուրի Սլյուսարը, գրում է Meduza-ն։

Ըստ նրա՝ Սալսկում՝ Օստրովսկի փողոցում, վնասվել է մեկ մեքենա, վարորդը զոհվել է: Բացի այդ՝  վնասվել է մասնավոր տան տանիքը և կոտրվել են պատուհանները, իսկ Օրլովսկի շրջանում վնասվել է էլեկտրական ենթակայանը։

Սլյուսարի խոսքով՝ հարձակման հետևանքով երկաթուղային կայարանում հրդեհ է բռնկվել։ «Ռուսական երկաթուղիներ»-ը հայտնել է, որ անօդաչու թռչող սարքերի  բեկորների անկման հետևանքով խաթարվել են Սալսկի կայարանի կապի ցանցի աշխատանքը և դադարեցվել է գնացքների երթևեկությունը։

«Ռուսական երկաթուղիներ»-ի տվյալներով՝ հարձակման հետևանքով վնասվել են Նովոկուզնեցկ-Կիսլովոդսկ № 59 ուղևորատար գնացքի երկու վագոնների ապակիները։ Գնացքի ուղևորները տարհանվել են, և նախնական տվյալներով՝  տուժածներ չկան։ Հրդեհ է բռնկվել  կանգնած բեռնատար գնացքում։

Դաշնային ուղևորափոխադրող ընկերությունը հայտնել է, որ Ռոստովի մարզի Սալսկ կայարանում «միջադեպի կապակցությամբ» Եկատերինբուրգից, Չելյաբինսկից, Անապայից և այլ քաղաքներից մեկնող գնացքներն ուշանում են։

Ռուսաստանի պաշտպանության նախարարությունը հայտնել է, որ հուլիսի 29-ի գիշերը ՀՕՊ համակարգերը որսացել և ոչնչացրել են ուկրաինական 74 անօդաչու թռչող սարք՝ 43-ը Բրյանսկի մարզի, 22-ը՝ Ռոստովի մարզի, 6-ը՝ Կալուգայի մարզի, 2-ը՝ Սմոլենսկի մարզի և 1-ը՝ Լենինգրադի մարզի վրա։

Թարգմանությունը՝ Էմմա Չոբանյանի