Հովիկ Աբրահամյանի խափանման միջոցը փոխվել է

ՀՀ նախկին վարչապետ Հովիկ Աբրահամյանի նկատմամբ ընտրված խափանման միջոցը փոխվել է. Հակակոռուպցիոն վերաքննիչ դատարանը որոշում է կայացրել Աբրահամյանի նկատմամբ խափանման միջոց սահմանել վարչական հսկողությունը: Այս մասին Factor TV-ի հարցմանն ի պատասխան հայտնեց Հակակոռուպցիոն դատարանների մամուլի խոսնակ Արմինե Նովրուզյանը։

Հիշեցնենք՝ Հովիկ Աբրահամյանը ձերբակալվել էր մի քանի դրվագ փողերի լվացման, պաշտոնեական լիազորությունները չարաշահելու և ձեռնարկատիրական գործունեությանն ապօրինի մասնակցության մեղադրանքներով։

Հովիկ Աբրահամյանը մեղադրյալի կարգավիճակ ունի նաև «Ավազահատիկ»-ի գործով։ Մասնավորապես, ըստ նախաքննական մարմնի՝ 2000 թվականին հիմնադրված «Ավազահատիկ» ընկերությունը Արարատի մարզում զբաղվել է հանքարդյունաբերությամբ՝ ներգրավելով վարկային միջոցներ, կատարել է շուրջ 80 հազար դոլարի ներդրում, ձեռք է բերել ավազի լվացման և մաղման հոսքագծեր։ Սակայն 2008 թվականին բարձրաստիճան պաշտոնատար անձինք ստեղծել են արհեստական խոչընդոտներ՝ պահանջելով ընկերության բաժնեմասերի 60 տոկոսը՝ նշելով, որ հակառակ պարագայում հանքերը չեն շահագործվի, ընդ որում, բաժնեմասերի 60 տոկոսը պահանջել են ձևակերպել երկու տարբեր անձանց անունով՝ յուրաքանչյուրին 30 տոկոս։

Բացի այդ, պարզվել էր, որ Նորամարգ համայնքի ղեկավարը հայցադիմում է ներկայացրել դատարան հողատարածքի վարձակալության վերաբերյալ․ այդ տարածքում ընկերությունը զբաղվում էր ավազի հանույթով։ Համայնքի ղեկավարը պահանջել էր լուծարել «Ավազահատիկ»-ի տնօրենի հետ ավելի վաղ ստորագրված պայմանագիրը։ Դատարանը բավարարել էր հայցադիմումը, ինչից հետո նոր պայմանագիր էր ստորագրվել տվյալ հողատարածքի վարձակալության վերաբերյալ այլ սեփականատերերի հետ։ Այդ ընկերության հիմնադիրը և այլ վկաներ իրենց ցուցմունքներում առերևույթ չարաշահումներին առնչություն ունեցած անձանց թվում մատնանշել էին Հովիկ և Հենրիկ Աբրահամյաններին, Ալիկ Սարգսյանին։

Ռոզա Վարդանյան