12.01.2026 | 21:13
Ալիևը Հայաստանին մեղադրել է ժամանակին Ադրբեջանի դեմ իրականացված «ջրային ահաբեկչության» մեջ
Թայլանդը և Կամբոջան համաձայնվել են բանակցություններ սկսել չորսօրյա մարտերից հետո
Քաղաքականություն
27.07.2025 | 20:27
Թայլանդը և Կամբոջան համաձայնվել են երկուշաբթի սկսել բանակցություններ Մալայզիայում՝ փորձելով վերջ դնել նախորդ շաբաթ բռնկված հակամարտությանը։ Սահմանին ռազմական գործողությունների մեկնարկից՝ հուլիսի 24-ից ի վեր, առնվազն 33 զինվորական և խաղաղ բնակիչ է զոհվել, իսկ հազարավոր թայլանդացիներ և կամբոջացիներ ստիպված են եղել լքել իրենց տները, փոխանցում է BBC-ի ռուսական ծառայությունը։
Շաբաթ օրը ԱՄՆ նախագահ Դոնալդ Թրամփը հեռախոսազրույց է ունեցել երկու երկրների ղեկավարների հետ՝ պահանջելով անհապաղ դադարեցնել կրակը։ Իսկ կիրակի Թայլանդը հայտարարել է, որ պատվիրակություն՝ գլխավորությամբ վարչապետի պաշտոնակատար Ֆումթամ Վեչայաչայի, կմասնակցի բանակցություններին։
Թայլանդի կառավարությունը նշել է, որ Մալայզիան տեղեկացրել է՝ Կամբոջայի վարչապետ Հում Մանեթը նույնպես կմասնակցի բանակցություններին։
Հիշեցնենք՝ Շոտլանդիայում գտնվող իր գոլֆի դաշտերն այցելելու անձնական այցի սկզբում Թրամփը Truth Social սոցիալական ցանցում գրել է, որ երկու երկրները «համաձայնվել են անհապաղ հանդիպել, արագ մշակել կրակի դադարեցման ռեժիմ և ի վերջո՝ ԽԱՂԱՂՈՒԹՅՈՒՆ»։
Երկու երկրներն էլ շնորհակալություն են հայտնել նրան՝ իր մտահոգության և ջանքերի համար, չնայած կիրակի լույս գիշերը գնդակոծությունները շարունակվել են։ Կամբոջան ընդունել է Թրամփի կրակի դադարեցման պահանջը, իսկ Թայլանդը շեշտել է երկխոսության անհրաժեշտությունը երկու երկրների միջև։
