Թուրքիայում ՀՀ-ից երաժշտական խմբին արգելել են մասնակցել Դերսիմի փառատոնին

Թուրքական իշխանությունները երեք երաժշտական խմբերի արգելել են մասնակցել քրդաբնակ Դերսիմ քաղաքում ամեն տարի անցկացվող Մունզուրի 23-րդ մշակույթի և բնության փառատոնին, փոխանցում  է Bianet-ը։

Մասնավորապես, Թունջելիի նահանգապետարանն արգելել է «Վերադարձ» հայկական ժողովրդական խմբին ելույթ ունենալ փառատոնին։ Արգելվել նաև Grup Yorum և  Grup İsyan Ateşi խմբերի մասնակցությունը։

Նահանգապետարանը պնդում էր, որ «Վերադարձ» ժողովրդական համույթը նախորդ տարիներին «շեղվել է միջոցառման նպատակից»՝ ներկայացումների ժամանակ ցուցադրելով Հայաստանի  դրոշը։ Արգելքի մասին իմանալուց հետո «Վերադարձ» համույթը վերադարձել է Վանից՝ նախքան Դերսիմ հասնելը։

Լրատվամիջոցն ընդգծում է, որ այս քայլը տեղի է ունենում այն ժամանակ, երբ Թուրքիան և Հայաստանը ներգրավված են հարաբերությունների կարգավորման գործընթացում: 2025 թվականի հունիսի 20-ին Հայաստանի վարչապետ Նիկոլ Փաշինյանը և Թուրքիայի նախագահ Ռեջեփ Թայիփ Էրդողանը հանդիպել են Ստամբուլում՝ քննարկելու տրանսպորտային կապերի վերաբացման, Անիի պատմական կամրջի վերականգնման և երկու երկրների միջև համագործակցության հնարավոր ոլորտների հետ կապված հարցեր:

Քուրդ երաժիշտ Միքաիլ Ասլանը քննադատել է որոշումը։

«Նահանգապետարանը կրկին խոչընդոտել է լեզուների, մշակույթների և ժողովուրդների միացմանը։ Այնուամենայնիվ, մենք կշարունակենք բարեկամության կամուրջներ կառուցել հայ ժողովրդի՝ մեր հին հարևանների և եղբայրական համայնքի հետ, որոնք արմատախիլ են արվել այստեղից ավելի քան մեկ դար առաջ: Ո՛չ բռնաճնշումները, ո՛չ էլ արգելքները չեն կարող կանգնեցնել մեր ստեղծած բարեկամության պարերն ու կամուրջները»,- ասել է նա։

Grup Yorum-ի և Grup İsyan Ateşi-ի ելույթների արգելքը իշխանությունները հիմնավորել են նրանով, որ խմբերը ելույթ են ունեցել անցյալ փառատոններին և մեղադրվել են «ահաբեկչական քարոզչության» մեջ, չնայած այս տարի նրանց ելույթը չի նախատեսվել։

Թարգմանությունը՝ Էմմա Չոբանյանի