11.03.2026 | 23:28
Իրանի սպորտի նախարարը հայտարարել է, որ երկիրը չի մասնակցի ֆուտբոլի աշխարհի առաջնությանը
Սիրիան դիմել է Թուրքիային՝ խնդրելով օգնել իր պաշտպանական կարողությունների ամրապնդմանը
Քաղաքականություն
23.07.2025 | 16:26
Սիրիայի կառավարությունը պաշտոնական խնդրանքով դիմել է Թուրքիային՝ աջակցություն ցուցաբերելու իր պաշտպանական կարողությունների ամրապնդման և ահաբեկչական կազմակերպությունների, մասնավորապես, ԻԼԻՊ-ի դեմ պայքարի գործում։ Անադոլու գործակալության փոխանցմամբ՝ այս մասին լրագրողներին հայտնել են Թուրքիայի պաշտպանության նախարարության աղբյուրները։
«Այս պահանջին համապատասխան՝ մենք շարունակում ենք աշխատանքը Սիրիայի պաշտպանական կարողությունը բարձրացնելու համար ուսուցում, խորհրդատվություն և տեխնիկական աջակցություն ցուցաբերելու ուղղությամբ»,- նշել են գերատեսչության ներկայացուցիչները։
Սիրիայի Սուեդա քաղաքում տեղի ունեցած բախումների և Դամասկոսի վրա Իսրայելի հարձակումների վերաբերյալ հարցին ի պատասխան՝ աղբյուրները նշել են, որ Իսրայելի վերջին հարձակումների ակտիվացումը սրել է դրուզ համայնքի և Դամասկոսի վարչակազմի միջև լարվածությունը, հատկապես՝ Սուեյդայի հարավային շրջանում։ Աղբյուրներն ընդգծել են, որ Թուրքիան պահպանում է Սիրիայի տարածքային ամբողջականության պաշտպանության, կայունության պահպանման և ահաբեկչական կազմակերպությունների դեմ պայքարի վճռական դիրքորոշումը։
«Ազգային պաշտպանության նախարարությունը սերտորեն համագործակցում է Սիրիայի նոր կառավարության հետ։ Թուրքիայի գլխավոր նպատակն է աջակցել Սիրիայի քաղաքական միասնությանը և տարածքային ամբողջականությանը, ինչպես նաև ղեկավարել տարածաշրջանում երկարատև խաղաղության հասնելու ջանքերը»,- նշել են Թուրքիայի ՊՆ-ից։
«Սիրիայի դեմոկրատական ուժեր» (SDF) քրդական կազմակերպության՝ Սիրիայի կառավարության ուժերին ինտեգրման վերաբերյալ հարցին թուրքական աղբյուրները պատասխանել են, որ Սիրիայի տարածքային ամբողջականության և ինքնիշխան իրավունքների պաշտպանությունը կարևոր է Թուրքիայի և տարածաշրջանի կայունության համար։ SDF-ը Թուրքիան համարում է ահաբեկչական։
«Հաշվի առնելով մարտի 10-ին Սիրիայի կառավարության և «Սիրիայի դեմոկրատական ուժերի» (SDF) միջև համաձայնեցված հարցերի անմիջական ազդեցությունը տեղում ստեղծված իրավիճակի վրա՝ մենք մտադիր ենք նպաստել այս կայունությանը հասնելուն։ SDF ահաբեկչական կազմակերպությունը պետք է հստակորեն ցույց տա, որ պահպանում է Դամասկոսի կառավարության հետ ձեռք բերված համաձայնագիրը։ Այս հարցի շուրջ իրադարձությունների զարգացումը մեր համապատասխան գերատեսչությունների խիստ հսկողության ներքո է»,- ասել են աղբյուրները։
Հիշեցնենք՝ նախօրեին Թուրքիայի ԱԳ նախարար Հաքան Ֆիդանը հայտարարել էր, որ եթե Սիրիայում խմբավորումները շարժվեն դեպի պառակտում և անկայունություն, Թուրքիան դա կհամարի իր ազգային անվտանգությանն ուղղակի սպառնալիք և կմիջամտի։
Թարգմանությունը՝ Էմմա Չոբանյանի
