17.02.2026 | 11:12
Հայ Ազգային Կոնգրեսն իր անվերապահ աջակցությունն է հայտնում Հայ Առաքելական եկեղեցուն․ հայտարարություն
Ֆիդանը զգուշացնում է՝ եթե Սիրիայում խմբավորումները պառակտման գնան, Թուրքիան դա կհամարի սպառնալիք և կմիջամտի
Քաղաքականություն
22.07.2025 | 20:47
Թուրքիան կդիտարկի ռազմական միջամտության հնարավորությունը, եթե Սիրիայի ներսում գործող խմբավորումները շարժվեն դեպի երկիրը պառակտելու և անկայունություն ստեղծելու ուղղությամբ։ Այս մասին հայտարարել է Թուրքիայի արտգործնախարար Հաքան Ֆիդանը՝ ուղղակիորեն մեղադրելով Իսրայելին տարածաշրջանը թուլացնելուն ուղղված քաղաքականություն վարելու մեջ, գրում է Turkiye today-ը։
«Եթե Սիրիայում խմբավորումները շարժվեն դեպի պառակտում և անկայունություն, Թուրքիան դա կհամարի իր ազգային անվտանգությանն ուղղակի սպառնալիք և կմիջամտի»,- ասել է Ֆիդանը Թուրքիայի մայրաքաղաքում Սալվադորի գործընկեր Ալեքսանդրա Հիլի հետ համատեղ մամուլի ասուլիսի ժամանակ։
Ֆիդանի մեկնաբանությունները հնչում են Սիրիայի հարավում լարվածության սրման ֆոնին, որտեղ հուլիսի 13-ին Սուեյդա քաղաքում բախումներ էին տեղի ունեցել բեդվին արաբ ցեղերի և զինված դրուզների միջև։ Բռնությունը հանգեցրել էր Իսրայելի կողմից Դամասկոսում սիրիական ռազմական դիրքերի և ենթակառուցվածքների ուղղությամբ ավիահարվածների, որտեղ Իսրայելը որպես հարձակումների արդարացում նշել էր «դրուզ համայնքի պաշտպանությունը»։
Թուրքիայի արտաքին գործերի նախարարը կտրուկ քննադատել է Իսրայելի տարածաշրջանային ռազմավարությունը՝ ասելով, որ երկիրը «վարում է տարածաշրջանը թուլացնելու և այն քաոսի մեջ պահելու քաղաքականություն»։ Նա մեղադրել է Իսրայելին Սիրիան դիտավորյալ բաժանելու համար թիրախավորելու մեջ՝ պնդելով, որ այն «չի ցանկանում իր տարածաշրջանում կայուն երկիր տեսնել»։
Այնուամենայնիվ, Սիրիայի դրուզ առաջնորդների մեծ մասը հրապարակավ մերժել է արտաքին միջամտությունը և վերահաստատել իրենց հանձնառությունը միասնական սիրիական պետությունը պահպանելու հարցում, ինչը հակասում է Իսրայելի կողմից ռազմական գործողությունների հայտարարված հիմնավորմանը։
Սիրիայի կառավարությունն արձագանքել է բռնության սրմանը՝ հայտարարելով Սուեյդայում հրադադարի չորս առանձին համաձայնությունների մասին, որոնցից վերջինը կնքվել է շաբաթ օրը, մինչ իշխանություններն աշխատում են զսպել անկարգությունները։
Լարվածությունը տեղի է ունենում Սիրիայի նոր կառավարության առջև ծառացած մարտահրավերների շրջանակում, որը 2024 թվականի դեկտեմբերի 8-ին նախագահ Բաշար Ասադի տապալումից ի վեր աշխատում է վերականգնել համազգային կարգուկանոնը։
Լրատվամիջոցն ընդգծում է, որ Թուրքիայի նախազգուշացումն ընդգծում է Անկարայի մտահոգությունը իր հարավային սահմանի երկայնքով հնարավոր մասնատման վերաբերյալ և նրա պատրաստակամությունը ռազմական գործողություններ ձեռնարկել՝ կանխելու համար այն, ինչը նա համարում է իր անվտանգային շահերին սպառնալիք։
Թարգմանությունը՝ Էմմա Չոբանյանի
