20.08.2026 | 23:01
«Նոան» նոր գլխավոր մարզիչ ունի
Ցմահ դատապարտյալ է պայմանական վաղաժամկետ ազատ արձակվել
Հասարակություն
23.07.2025 | 10:06
«Վարդաշեն» քրեակատարողական հիմնարկում պահվող ցմահ դատապարտյալ է պայմանական վաղաժամկետ ազատ արձակվել։ Այս մասին Factor TV-ի գրավոր հարցմանն ի պատասխան հայտնեցին Արդարադատության նախարարությունից։ Թե ո՞վ է ազատ արձակված դատապարտյալը, ի՞նչ հիմքով է դատարանը բավարարել դիմումը, գերատեսչությունից չեն հայտնում՝ հղում կատարելով «Անձնական տվյալների պաշտպանության մասին» օրենքին։ Ըստ ամենայնի, ցմահ դատապարտյալն ազատ է արձակվել մայիսից հուլիսն ընկած ժամանակահատվածում, քանի որ նախորդ՝ մայիս ամսին ուղարկված հարցման ժամանակ, ԱՆ-ից Factor TV-ին հայտնել էին՝ 2021-ից ի վեր դեռևս որևէ դիմում չի բավարարվել։
Հայաստանում 2018 թվականից ի վեր ընդամենը 6 ցմահ դատապարտյալ է պայմանական վաղաժամկետ ազատ արձակվել։ 2018 թվականին առաջին անգամ Կարեն Օգանեսյանի մասով էր դատարանը բավարարել դիմումը և հենց նիստերի դահլիճից ազատ արձակել ցմահ դատապարտյալին։ Նույն թվականի դեկտեմբերին պատժի կրման հետ անհամատեղելի հիվանդությունների հիմքով դատարանը բավարարել էր «Արթիկ» ՔԿՀ-ում պահվող Վահագն Մարուքյանի՝ պայմանական վաղաժամկետ ազատ արձակման միջնորդությունը։
2020 թվականի հունվարին «Արմավիր» ՔԿՀ-ի ցմահ դատապարտյալ Աշոտ Մանուկյանն էր պայմանական վաղաժամկետ ազատ արձակվել։ Դատարանը հաշվի էր առել դատապարտյալի պատշաճ և դրական վարքագիծը։
Երեք ամիս անց՝ ապրիլին ևս մեկ դիմում էր բավարարվել և կրկին «Արմավիր» ՔԿՀ-ի ցմահ դատապարտյալ էր ազատ արձակվել։ Դատարանը հաշվի էր առել, որ դատապարտյալ Ստեփան Գրիգորյանը դրական բնութագիր ուներ և 25 տարի անազատության մեջ գտնվելով՝ դրսևորել է դրական վարքագիծ։ Ցավոք, Գրիգորյանը հասցրեց ազատության մեջ անցկացնել ընդամենը 2 տարի. 2022 թվականի մարտին նա մահացավ սրտի կաթվածից։
Վերջին ցմահ դատապարտյալը, որի պայմանական վաղաժամկետ ազատ արձակման դիմումը բավարարվել էր, «Դրո»-ի գործով ցմահ ազատազրկման դատապարտված Արսեն Արծրունին էր։ Որոշումը կայացվել էր 2021 թվականին, ինչից հետո՝ անցած 4 տարվա ընթացքում, որևէ ցմահ դատապարտյալի չէր հաջողվել դատարանի կողմից լսել այդքան սպասված դրական որոշումը։
Ուշագրավ է, որ Արդարադատության նախարարությունից Factor TV-ի հարցմանն ի պատասխան հայտնել էին, որ 5 դատապարտյալ է պայմանական վաղաժամկետ ազատ արձակվել, այնինչ FactorTV-ն արձանագրել է, որ նրանց թիվն այս պահին 6-ն է։ Ավելին, սխալ տարեթվեր էին ներկայացվել։
Ռոզա Վարդանյան
