05.10.2026 | 22:33
Հայաստանի մի շարք հասցեներում էլեկտրաէներգիայի անջատումներ կլինեն
Դատարանն անփոփոխ թողեց Գագիկ Բեգլարյանի նկատմամբ ընտրված 50 մլն դրամ գրավը
Հասարակություն
22.07.2025 | 15:32
Հակակոռուպցիոն դատարանը Սուրեն Խաչատրյանի նախագահությամբ քննում է Բնապահպանության նախկին նախարար, Կենտրոնի նախկին թաղապետ և Երևանի նախկին քաղաքապետ Գագիկ Բեգլարյանի ու ևս երկու անձի վերաբերյալ գործը: Դատարանն այժմ նախնական դատալսումների փուլում է, որի շրջանակներում քննարկման առարկա հարցերից մեկը մեղադրյալների նկատմամբ խափանման միջոցի հարցն է:
Գագիկ Բեգլարյանի նկատմամբ խափանման միջոց է ընտրված 50 մլն դրամ գրավը, մյուս երկու մեղադրյալի՝ Գագիկ Բաղդասարյանի և Գագիկ Գյանջումյանի նկատմամբ՝ 20 մլն դրամ գրավը՝ համակցված բացակայելու արգելքի հետ:
Գագիկ Գյանջումյանի և Գագիկ Բաղդասարյանի պաշտպանները միջնորդեցին վերացնել գրավն ու բացակայելու արգելքը՝ նշելով, որ իրենց պաշտպանյալները նախաքննության ընթացքում պատշաճ վարքագիծ են դրսևորել: Ավելին՝ պաշտպանները դիտարկեցին, որ մեղադրյալներից Գյանջումյանի մեղադրանքով վաղեմության ժամկետն արդեն անցած է, նա այժմ պահանջում էր շարունակել գործի քննությունը որպեսզի արդարացվի և որպես արդարացված մեղադրյալ ռեաբիլիտացիա պահանջի:
Մյուս մեղադրյալի՝ Գագիկ Բաղդասարյանի մեղադրանքով վաղեմության ժամկետը ևս մոտ էլ ավարտին: Նման պայմաններում, ըստ պաշտպանական կողմի, իրենց պաշտպանները որևէ պատճառ չունեն գործի քննությանը չներկայանալու կամ այլ կերպ խոչընդոտելու վարույթին: Մեղադրող Ծովակ Մնացականյանը, սակայն, առարկեց մեղադրյալների նկատմամբ ընտրված խափանման միջոցները վերացնելու միջնորդության դեմ:
Ըստ հանրային մեղադրողի՝ հարկադրանքի միջոցների կիրառումը բխում է արդարադատության շահից, և այն, որ դեռևս նախաքննության ընթացքում մեղադրյալների նկատմամբ ընտրված խափանման միջոցները ապահովել են նրանց պատշաճ վարքագիծը վարույթի ընթացքում խոսում է այն մասին, որ նրանց նկատմամբ ճիշտ խափանման միջոցներ են ընտրվել, որոնք այժմ պետք է պահպանվեն: Դատարանը որոշեց անփոփոխ թողնել 3 մեղադրյալի նկատմամբ ընտրված խափանման միջոցները: Նշենք, որ Գագիկ Բեգլարյանը մեղադրվում է Կենտրոնի թաղապետ եղած ժամանակ պաշտոնեական լիազարությունները չարաշահելու և փողերի լվացման, իսկ Գագիկ Բաղդասարյանն ու Գյանջումյանը՝ պաշտոնեական լիազորությունները չարաշահելուն օժանդակելու և փողերի լվացման հոդվածներով:
Արաքս Մամուլյան
