«Ադրբեջանի քաղաքացին, ուղևորվելով Նախիջևան, չպետք է հանդիպի հայկական սահմանապահների հետ»․ Ալիև

«Աբու Դաբիում ես Հայաստանի ղեկավարին ասացի, որ մենք պետք է ունենանք անխոչընդոտ և անվտանգ անցում Ադրբեջանի մի հատվածից դեպի մյուսը»,-այս մասին Ադրբեջանի նախագահ Իլհամ Ալիևը հայտարարել է Շուշիում կայացած 3-րդ գլոբալ մեդիաֆորումի մասնակիցների հետ հանդիպման ժամանակ։

Ադրբեջանական լրատվամիջոցների փոխանցմամբ՝ նա նշել է, որ Ադրբեջանի քաղաքացին, ուղևորվելով Նախիջևան, չպետք է հանդիպի հայկական սահմանապահների հետ։

«Ինչ վերաբերում է մեզ՝ մեր տարածքում ո՛չ արտաքին օպերատոր է լինելու, ո՛չ էլ վարձակալություն»,-ընդգծել է նա։

Միևնույն ժամանակ Ալիևը նշել է, որ եթե Հայաստանը շարունակի արգելափակել «Զանգեզուրի միջանցքի» բացման հետ կապված գործընթացը, ապա տարանցիկ երկիր դառնալու ՀՀ-ի շանսերը կզրոյանան։

«Ցավոք, հայկական կողմում ոչ մի աշխատանք («Զանգեզուրի միջանցքի» հետ կապված-խմբ.) վերջին հինգ տարիների ընթացքում չի տարվել։ Այս հարցը գիտակցաբար հանվում է օրակարգից։ Այդ դեպքում Հայաստանի՝ երբևէ տարանցիկ երկիր դառնալու շանսերը մոտենում են զրոյի։ Եթե նրանք շարունակեն արգելափակել այդ գործընթացը, կարծում եմ, որ նրանք կհայտնվեն ոչ միայն տրանսպորտային մեկուսացման մեջ, որում նրանք այսօր գտնվում են, այլև՝ որոշ չափով քաղաքական մեկուսացման մեջ»,-նշել է Ալիևը։

Ադրբեջանի նախագահը պնդել է, թե «այդ զարկերակը շատ երկրներ իրար կկապի», հատկապես «աշխարհքաղաքական վերջին փոփոխությունների պարագայում, երբ տարանցիկ մյուս ճանապարհները դառնում են առավել խնդրահարույց»։

«Մեր գնահատմամբ, «Զանգեզուրի միջանցքը» սկզբնական շրջանում 15մլն տոննա բեռ փոխադրելու ներուժ ունի։ Մենք գործնականում ավարտում ենք երկաթգծի շինարարությունը՝ մինչև Հայաստանի ու Իրանի հետ մեր սահմանակետ, և մեկ տարուց էլ պակաս ժամանակահատվածում, գուցե՝ հաջորդ տարվա գարնանը, այդ երկաթգծի ադրբեջանական հատվածը կառուցված կլինի»,-ասել է նա։

Ալիևը պնդել է նաև, թե խորհրդային տարիներին Հայաստանով անցնող երկաթգծի այդ՝ Ադրբեջանի մայր տարածքը Նախիջևանին կապող հատվածը «պատկանել է ադրբեջանցիներին և չի եղել հայկական երկաթուղու կառուցվածքում»։