06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
ԵՄ երկրները համաձայնեցրել են ՌԴ-ի դեմ պատժամիջոցների 18-րդ փաթեթը
Քաղաքականություն
18.07.2025 | 11:53
ԵՄ երկրների դեսպանները համաձայնեցրել են Ռուսաստանի դեմ պատժամիջոցների 18-րդ փաթեթը։ Այս մասին գրում է «Ազատություն» ռադիոկայանի եվրոպական հարցերի խմբագիր Ռիկարդ Յոզվյակը։ dpa գործակալությունն իր հերթին, հղում անելով մի քանի դիվանագետների, նշում է, որ ԵՄ անդամ 27 պետությունները համաձայնության են եկել Ռուսաստանի դեմ պատժամիջոցների 18-րդ փաթեթի շուրջ՝ Ուկրաինա ներխուժելու համար։
Եվրոպական դիվանագիտության ղեկավար Կայա Կալլասը հաստատված պատժամիջոցների փաթեթն անվանել է «ամենախիստ սահմանափակումներից մեկը»։
«ԵՄ-ն հենց նոր հաստատել է Ռուսաստանի դեմ մինչ օրս կիրառած ամենախիստ պատժամիջոցների փաթեթներից մեկը։ Մենք կրճատում ենք Կրեմլի ռազմական բյուջեն՝ հետապնդելով ևս 105 ստվերային նավատորմի նավ, դրանց օժանդակող միջոցները և սահմանափակելով ռուսական բանկերի հասանելիությունը ֆինանսավորմանը»,- գրել է նա X-ի իր միկրոբլոգում։
Կալլասը նշել է, որ «Հյուսիսային հոսք» խողովակաշարերը կարգելվեն, նավթի գնի ավելի ցածր սահման կլինի։
«Մենք ավելի մեծ ճնշում ենք գործադրում Ռուսաստանի ռազմական արդյունաբերության, պատժամիջոցներից խուսափելու հնարավորություն տվող չինական բանկերի և անօդաչու թռչող սարքերում օգտագործվող տեխնոլոգիաների արտահանման վրա»,- գրել է Կալասը։
Նոր փաթեթը, ի թիվս այլ բաների, ներառում է ռուսական նավթի գնի շեմի իջեցում (60 դոլարից մինչև 47,6 դոլար՝ մեկ բարելի համար), ինչպես նաև ևս 22 ռուսական բանկերի անջատում SWIFT-ից։
Սլովակիան խոչընդոտում էր պատժամիջոցների 18-րդ փաթեթի ընդունմանը՝ Եվրահանձնաժողովի կողմից 2028 թվականից ռուսական գազի ներմուծումն ամբողջությամբ արգելելու առաջարկի պատճառով։ Բրատիսլավան պնդում էր, որ նման միջոցառումը կարող է գազի պակաս առաջացնել, բարձրացնել գները և տարանցման վճարները, ինչպես նաև դատական հայցեր առաջացնել «Գազպրոմի» կողմից։
Հուլիսի 17-ին, սակայն, երկրի վարչապետ Ռոբերտ Ֆիցոն հայտարարել էր, որ հակասությունները լուծվել են։ Նրա խոսքով՝ Սլովակիայի դիրքորոշման վրա ազդել են Եվրահանձնաժողովի ղեկավար Ուրսուլա ֆոն դեր Լեյենի հետ երաշխիքների վերաբերյալ բանակցությունները։
Թարգմանությունը՝ Էմմա Չոբանյանի
