04.08.2026 | 19:43
Հայաստանում «վերադարձի հանգույց» ստեղծելու հարց ԵՄ նախարարների տեսակոնֆերանսում չի քննարկվել. ԵՄ հանձնակատար
Այո՛, Հայաստանն ուզում է դառնալ ԵՄ անդամ․ Փաշինյան․ ՏԵՍԱՆՅՈՒԹ
Քաղաքականություն
16.07.2025 | 15:07
«Հարց է հնչում, թե արդյոք ընդունված օրենքը նշանակում է, որ Հայաստանն ուզում է դառնալ ԵՄ անդամ: Իմ պատասխանը եղել է, որ, այո՛, Հայաստանը ուզում է դառնալ Եվրոպական միության անդամ, և խոսակցության շարունակությունը եղել է հետևյալը, որ և՛ եվրոպացի գործընկերները, և՛ մենք արձանագրել ենք, որ որևէ երկրի ԵՄ անդամ դառնալը պարզ պրոցես չէ: Նախ՝ ԵՄ բոլոր անդամները պետք է դրա հետ համաձայնվեն, և նույնքան կամ ոչ պակաս կարևոր՝ երկիրը պետք է համապատասխանի ԵՄ չափանիշներին»,- այսօր տեղի ունեցած մամուլի ասուլիսի ժամանակ ասաց վարչապետ Նիկոլ Փաշինյանը։
Նրա խոսքով՝ իրենից հաճախ են հարցնում, թե ինչպես է պատկերացնում այդ խնդրի լուծումը.
«Համապարփակ և ընդլայնված գործընկերության մասին պայմանագրով և առաջիկայում կլինի ՀՀ-ԵՄ համագործակցության նոր օրակարգը, մենք այդ ամեն ինչի սահմաններում մեր երկրի բարեփոխումները շարունակելու ենք մինչև այն կետը, որ օբյեկտիվորեն ՀՀ-ն բոլոր առումներով համապատասխանի եվրոպական ստանդարտներին: Այս կետում կա երկու տարբերակ. կամ Հայաստանին ընդունում են ԵՄ անդամ, կամ ՀՀ-ին չեն ընդունում ԵՄ անդամ: Եթե Հայաստանին ընդունում են ԵՄ անդամ՝ շատ լավ, եթե ինչ-ինչ պատճառներով ՀՀ-ին չեն ընդունում ԵՄ անդամ, Հայաստանը այդ կետի վրա լինում է եվրոպական ժամանակակից ստանդարտներին համապատասխանող երկիր: Երկու դեպքում էլ մենք այս ռազմավարությունը չշարունակելու որևէ պատճառ չունենք»։
Հարցի շրջանակներում Փաշւնյանն անդրադարձավ նաև վիզաների ազատականացման և վիզաներ ստանալու խնդրին.
«Վիզաների ազատականացման գործընթացը բավականին հաջող ընթանում է: Իհարկե, դա աշխատատար պրոցես է, բայց մենք մեր գործընկերների ուշադրությունն ենք հրավիրել այն փաստի վրա, որ հիմա եվրոպական, ԵՄ անդամ երկրների դեսպանատներում շատ մեծ հերթեր են, և մարդիկ ամիսներ են սպասում: Այսօրվա հերթագրումից հետո հերթը կարող է հասնել 6 ամիս հետո, 7 ամիս հետո, և դա մեծ պրոբլեմ է: Իհարկե, սա նաև կապված է ինչի՞ հետ. հոսքը շատացել է դեպի ԵՄ»։
Մանրամասները՝ տեսանյութում։
