07.08.2026 | 23:37
Անձրև, ամպրոպ և ջերմաստիճանի նվազում. առաջիկա օրերի եղանակի կանխատեսումը
Թրամփը Զելենսկիին ասել է, որ Կիևը պետք է ավելի շատ ճնշում գործադրի Պուտինի վրա՝ հարվածելով Մոսկվային ու Պետերբուրգին․ դիտարկվում է Tomahawk հրթիռների մատակարարման հարցը․ WP
Քաղաքականություն
15.07.2025 | 16:50
ԱՄՆ նախագահ Դոնալդ Թրամփը դիտարկում է Ուկրաինային Tomahawk թևավոր հրթիռներ մատակարարելու հնարավորությունը՝ որպես Ռուսաստանի վրա ճնշում գործադրելու միջոց։ Այս մասին հայտնել են Washington Post-ի սյունակագիր Դեյվիդ Իգնատիուսի աղբյուրները, փոխանցում է BBC-ի ռուսական ծառայությունը։
«Ճնշում գործադրելով Պուտինի վրա՝ Թրամփը «սրում է լարվածությունը՝ այն ապաէսկալացնելու համար» վերնագրով սյունակում Իգնատիուսն անդրադառնում է ԱՄՆ նախագահի և Ուկրաինայի ղեկավար Վլադիմիր Զելենսկիի միջև անցյալ շաբաթ տեղի ունեցած զրույցին։
«Թրամփը հարցրել է Զելենսկիին, թե ինչո՞ւ նա չի հարվածում Մոսկվային»,- պնդում է լրագրողը։ Ի պատասխան՝ Զելենսկին ասել է․ «Մենք կարող ենք դա անել, եթե դուք մեզ զենք տաք»։
«Թրամփն ասել է, որ Ուկրաինան պետք է ավելի շատ ճնշում գործադրի Պուտինի վրա, և դա վերաբերում է ոչ միայն Մոսկվային, այլև Սանկտ Պետերբուրգին»,- պնդում է հրապարակման հեղինակը։
Իգնատիուսի աղբյուրների համաձայն՝ Թրամփը քննարկում է Կիևին Tomahawk թևավոր հրթիռներ մատակարարելու հնարավորությունը, նույն զենքերը, որոնք ԱՄՆ-ն օգտագործել է Իրանի դեմ հունիսին։
«Եթե դրանք արձակվեն Ուկրաինայից, դրանք կարող են հարվածել Մոսկվային և Սանկտ Պետերբուրգին։ Դրանք քննարկվող տարբերակների շարքում էին դեռևս ուրբաթ։ Այնուամենայնիվ, ինձ տեղեկացրել են, որ Tomahawk-ները դեռ չեն ներառվել մատակարարվող զենքերի ցանկում։ Դրանք կարող են մատակարարվել ավելի ուշ, եթե Թրամփը ցանկանա ավելի մեծ ճնշում գործադրել [Ռուսաստանի վրա]»,- ասվում է հրապարակման մեջ։
Ուկրաինայի օգնության փաթեթում, որն ուղարկվում է նոր սխեմայի շրջանակում (ՆԱՏՕ-ի երկրները զենք են գնում ԱՄՆ-ից և ուղարկում Կիևին), օգնության չափը կազմում է 10 միլիարդ դոլար, հայտնել է Իգնատիուսի աղբյուրը։ Բացի այդ, Վաշինգտոնը կարող է թույլ տալ Կիևին օգտագործել Ուկրաինայի զինված ուժերի սպառազինության մեջ գտնվող 18 ATACMS բալիստիկ հրթիռները՝ Ռուսաստանին մինչև 300 կմ հեռավորության վրա հարվածելու համար: Այս հրթիռներից ավելի մեծ քանակություն կարող է ներառվել նոր օգնության փաթեթում:
Հրապարակման մեջ նաև ասվում է, որ Թրամփը որոշել է մեծացնել Ռուսաստանի վրա ճնշումը երեք պատճառով՝ նա կասկածում է, որ [ՌԴ նախագահ] Պուտինը չի հարգում իրեն, նա համոզվել է ամերիկյան ռազմական ուժի արդյունավետության մեջ Իրանին հարվածների միջոցով, նաև կարծում է, որ Պուտինը կբանակցի միայն այն դեպքում, եթե նրան սպառնան ավելի շատ ուժի կիրառմամբ։
Թարգմանությունը՝ Էմմա Չոբանյանի
