ՌԴ-ն հարվածել է Ուկրաինային ԱԹՍ-ներով ու հրթիռներով․ Դնեպրոպետրովսկի ու Սումիի մարզերում կան զոհեր և վիրավորներ

Ռուսական զորքերը հուլիսի լույս 14-ի գիշերը հարձակվել են Ուկրաինայի վրա չորս C-300/400 զենիթային կառավարվող հրթիռներով, 136 հարվածային թռչող սարքերով ու ԱԹՍ-իմիտատորներով։ Այս մասին հաղորդել է Ուկրաինայի ռազմաօդային ուժերի հրամանատարությունը, գրում է Current time-ը։

Ուկրաինական զինվորականների նախնական տվյալների համաձայն՝ տեղական ժամանակով 8:30-ի դրությամբ ՀՕՊ ուժերը երկրի հյուսիսում, արևելքում և կենտրոնում խոցել են 61 անօդաչու թռչող սարք։ Բացի այդ, 47 անօդաչու թռչող սարքի իմիտատորներ անհետացել կամ ճնշվել են ռադիոէլեկտրոնային պայքարի միջոցով։

Ուկրաինայի Դնեպրոպետրովսկի մարզի Կամենսկի շրջանի Դնեպրովսկոյե գյուղում վիրավորվել է երեք մարդ՝ 51-ամյա տղամարդ և երկու 13-ամյա աղջիկներ։ Բոլոր վիրավորները հոսպիտալացվել են, տղամարդու վիճակը ծանր է, հայտնել է տարածաշրջանային ռազմական վարչակազմի ղեկավար Սերգեյ Լիսակը։

Նրա նշել է, որ հարձակման հետևանքով հրդեհվել է երեք տուն, երկու ավտոտնակ, չորս օժանդակ շինություն և անտառը։ Յոթ մեքենա ոչնչացվել է, ևս չորսը՝ վնասվել։

Սումիի մարզի Շոստկա շրջանում անօդաչու թռչող սարքերի և կառավարվող ավիառումբերի հարձակման հետևանքով զոհվել է երկու տղամարդ՝ 50 և 55 տարեկան, վիրավորվել՝ 4 անձ։ Մարզային ռազմական վարչակազմի ղեկավար Օլեգ Գրիգորովի խոսքով՝ զոհերը հարձակման ժամանակ փողոցում են եղել և տեղում մահացել են ստացած վնասվածքներից։ Նա նշել է, որ Շոստկա քաղաքում վնասվել են 30 բազմահարկ, մասնավոր տներ և ոչ բնակելի շենքեր։ Ավերվել է քաղաքացիական ենթակառուցվածքի օբյեկտ, վերացվում են հետևանքները, պարզվում են ավերածությունների ծավալները։

Սումի համայնքում հրդեհ է բռնկվել անօդաչու թռչող սարքի հարձակման հետևանքով։ Գրիգորովի խոսքով՝ վնասվել են ոչ բնակելի շենքեր, ոչ ոք չի տուժել։

Թարգմանությունը՝ Էմմա Չոբանյանի