12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Թրամփի հատուկ բանագնաց Քիթ Քելլոգը ժամանել է Կիև
Քաղաքականություն
14.07.2025 | 11:35
ԱՄՆ նախագահ Դոնալդ Թրամփի՝ Ուկրաինայի հարցերով հատուկ ներկայացուցիչ Քիթ Քելլոգը ժամանել է Կիև։ Նրա այցը երկարատև է լինելու։ Այս մասին հայտնում է ՌԲԿ Ուկրաինան՝ վկայակոչելով Ուկրաինայի նախագահի գրասենյակի ղեկավար Անդրեյ Երմակի տելեգրամում գրառումը։
Ըստ Երմակի՝ զրույցի թեմաները կլինեն պաշտպանությունը, անվտանգության ամրապնդումը, զենքը, պատժամիջոցները, մարդկանց պաշտպանությունը, Ուկրաինայի և Միացյալ Նահանգների միջև համագործակցության ամրապնդումը։
«Ռուսաստանը չի ցանկանում դադարեցնել կրակը։ Ուժի միջոցով խաղաղությունը ԱՄՆ նախագահ Դոնալդ Թրամփի սկզբունքն է, և մենք աջակցում ենք այս մոտեցմանը»,- նշել է նա։
Քելլոգը Կիև այցի մասին ուկրաինական լրատվամիջոցներին հայտնել էր Հռոմում, որտեղ անցյալ շաբաթ անցկացվել է Ուկրաինայի վերակառուցման համաժողովը։
Ուկրաինայի նախագահ Վլադիմիր Զելենսկին պարզաբանել է, որ ԱՄՆ նախագահի հատուկ ներկայացուցչին կտրամադրվի տեղեկատվություն Ռուսաստանի ներուժի և Ուկրաինայի հեռանկարների մասին։ Զելենսկին այս հրամանը տվել է Ուկրաինայի զինված ուժերի գլխավոր հրամանատար Ալեքսանդր Սիրսկիին և գլխավոր շտաբի պետ Անդրեյ Գնատովին։
«Մենք նաև նախապատրաստում ենք հանդիպումներ նախագահ Թրամփի հատուկ ներկայացուցչի և Ուկրաինայի անվտանգության ծառայության, ինչպես նաև մեր հետախուզական ծառայությունների ղեկավարների միջև։ Տեղեկատվությունը կլինի ամբողջական»,- հաղորդել էր նա։
Սա Դոնալդ Թրամփի հատուկ ներկայացուցչի առաջին այցը չէ Ուկրաինա։ Քելլոգի վերջին՝ երկօրյա այցը Ուկրաինա տեղի էր ունեցել փետրվարին։
Թարգմանությունը՝ Էմմա Չոբանյանի
