Ափսոս՝ մեր կինոթատրոնները կործանեցին, կուզեինք «Ոսկե ծիրան»-ի բացումը մեծ դահլիճում անել․ Հարություն Խաչատրյան. ՏԵՍԱՆՅՈՒԹ

«Ոսկե ծիրան» միջազգային կինոփառատոնն այս տարի կբացվի իրանցի ռեժիսոր Փանահիի ֆիլմով, որը վերջերս «Կանն»-ում արժանացել է գլխավոր մրցանակի։ Հատկանշական է, որ բանտից դուրս գալուց հետո նախորդ տարի նա եկավ՝ մասնակցելու մեր փառատոնին, այս տարի էլ գալիս է՝ բերելով իր ֆիլմը՝ «Կանն»-ի փառատոնից»,- Factor TV-ի հետ զրույցում նշում է «Ոսկե ծիրան» միջազգային կինոփառատոնի համահիմնադիր և նախագահ Հարություն Խաչատրյանը։

Նա հիշում է՝ երբ 22 տարի առաջ առաջին անգամ կազմակերպել էին «Ոսկե ծիրան»-ը, թերթերը գրել էին, թե անիմաստ է կինոփառատոն անցկացնել մի երկրում, որը չունի կինո․ «Դա վիրավորական էր, բայց տարեցտարի հավատը փառատոնի հանդեպ մեծացավ, այն սիրվեց ու ընդլայնեց շրջանակները»։

Հարություն Խաչատրյանը շեշտում է՝ կուզենար, որ փառատոնի բացման և փակման ֆիլմերը ցուցադրվեին մեծ դահլիճներում․ «Ափսոս, որ մեր կինոթատրոնները կործանեցին, շենքերը վաճառեցին, խոստացան, որ դրանք պետք է պահպանվեն, գործեն որպես կինոթատրոններ, բայց այսօր դրանք չեն աշխատում»։

Ռեժիսորը խոսում է նաև կինոյի ոլորտի մեր հովանավորների մասին՝ նկատելով, որ մենք չունենք այն դպրոցը, որտեղ հովանավորներ «կաճեցնեն»․ «Կգա ժամանակ, երբ հովանավորները կհասկանան, որ պետք է անպայման մասնակցել փառատոնների կայացմանը։ Մինչդեռ նրանք շատ արագ են ուզում օգտվել իրենց ներդրած գումարից»։

Հարություն Խաչատրյանն անդրադառնում է նաև կինոյի և հեռուստատեսության կապին՝ տեսակետ հայտնելով, որ այս երկուսը միասին արդյունավետ չեն աշխատում Հայաստանում․ «Հեռուստատեսությունը շատ քիչ է անդրադառնում հայկական կինոյի հաջողություններին, մինչդեռ պետք է գնեին հաջողված ֆիլմերի հեղինակային իրավունքները և ցուցադրեին, որպեսզի օգնեին արտադրությանն ու պրոպագանդմանը։ Բայց կինոյի ու հեռուստատեսության միջև այդ կապը չկա, հայկական էգոիզմն ու միայնակությունը խանգարում է։ Պետք է սովորել աշխատել միասին՝ իրար պրոպագանդելով»։

Մանրամասները՝ տեսանյութում։

Աննա Բաբաջանյան