22.05.2026 | 23:50
Անդրանիկ Թևանյանի նկատմամբ հարուցվել է քրեական հետապնդում պետական դավաճանության հանցակազմի հատկանիշներով
PKK-ն զինաթափվել է․ հրապարակվել են արարողության առաջին կադրերը․ ԼՈՒՍԱՆԿԱՐՆԵՐ
Քաղաքականություն
11.07.2025 | 14:54
Քուրդիստանի աշխատավորական կուսակցությունն (PKK) այսօր անցկացրել է զինթափման խորհրդանշանական արարողություն Հյուսիսայի Իրաքի Սուլեյմանիե շրջանի Չասանե քարանձավում։ PKK-ն որոշել էր ինքնալուծարվել բանտարկված առաջնորդ Աբդուլլահ Օջալանի կոչից հետո։
Թուրքական աղբյուրները գրում են, որ Քուրդիստանի աշխատավորական կուսակցության 30 մարտիկներ, որոնցից չորսը հրամանատարներ են, այրել են իրենց զենքերը։ Քրդական Channel 8-ի տարածած լուսանկարներում երևում է, թե ինչպես են PKK-ի անդամները վայր դնում զենքերը և այրում դրանք։
«Մենք՝ մարտիկ կանայք և տղամարդիկ, ովքեր տարբեր ժամանակներում միացել են Քուրդիստանի աշխատավորական կուսակցությանը, զենք են վերցրել և կռվել տարբեր շրջաններում՝ քրդական գոյությունը ժխտելու և ոչնչացնելու նպատակով հարձակումների դեմ պայքարելու համար, այսօր այստեղ ենք՝ ի պատասխան քուրդ ժողովրդի առաջնորդ Աբդուլլահ Օջալանի 2025 թվականի հունիսի 19-ի կոչի։ Մեր ժամանումը հիմնված է նաև առաջնորդ Աբդուլլահ Օջալանի կողմից 2025 թվականի փետրվարի 27-ին հայտարարված խաղաղության և ժողովրդավարական հասարակության կոչի և մայիսի 5-7-ը կայացած Քրդական աշխատավորական կուսակցության 12-րդ համագումարի որոշումների վրա։ Խաղաղության և ժողովրդավարական հասարակության գործընթացի գործնական հաջողության համար բարի կամքի և վճռականության քայլ, ինչպես նաև ազատության, ժողովրդավարության և սոցիալիզմի համար մեր պայքարը ժողովրդավարական քաղաքական և իրավական մեթոդներով շարունակելու նպատակով և ժողովրդավարական ինտեգրման օրենքների ընդունման հիման վրա, մենք մեր ազատ կամքով ոչնչացնում ենք մեր զենքերը ձեր ներկայությամբ»,- ասվում է հայտարարության մեջ։
Նրանք նաև կոչ են անում քուրդ ժողովրդի տառապանքների համար պատասխանատու բոլոր տարածաշրջանային և համաշխարհային տերություններին՝ հարգել իրենց ժողովրդի օրինական և ժողովրդավարական ազգային իրավունքներն ու աջակցել խաղաղ և ժողովրդավարական կարգավորման գործընթացին։ Խումբը նաև կոչ է անում ավելի ակտիվորեն պայքարել PKK առաջնորդ Աբդուլլահ Օջալանի ֆիզիկական ազատ արձակման և քրդական հարցի ժողովրդավարական քաղաքական լուծման համար։
1970-ականների վերջին Աբդուլլահ Օջալանի կողմից հիմնադրված PKK-ն 1984 թվականին զինվել է՝ սկսելով հարձակումների շարք թուրքական տարածքում, որը հանգեցրել է հակամարտության։ Այն խլել է ավելի քան 40,000 մարդու կյանք։
Հիշեցնենք, որ օրերս Քուրդիստանի աշխատավորական կուսակցության (PKK) առաջնորդ Աբդուլլահ Օջալանը նոր կոչ էր արել «Խաղաղության և ժողովրդավարական հասարակության գործընթացի» շրջանակում։ 1999 թվականից ի վեր առաջին նման տեսաուղերձում Օջալանը պաշտպանել էր քաղաքական և սոցիալական խաղաղությունը զինված մեթոդներից վեր դասող մոտեցումը։
Թարգմանությունը՝ Էմմա Չոբանյանի
