12.01.2026 | 21:26
Չաբի Ալոնսոն հեռացվեց «Ռեալից»
ՄԱԿ-ը հաստատել է, որ հունիսին Ուկրաինայում զոհվել է 232 խաղաղ բնակիչ. այն 2022 թվականի ապրիլից ի վեր ամենամահաբեր ամիսն է եղել
Քաղաքականություն
10.07.2025 | 22:35
Ուկրաինայում ՄԱԿ-ի մարդու իրավունքների մոնիթորինգի առաքելությունը հրապարակել է հունիս ամսվա զեկույցը զոհված և վիրավորված խաղաղ բնակիչների թվի վերաբերյալ, փոխանցում է BBC-ի ռուսական ծառայությունը։
Առաքելությանը հաջողվել է հաստատել մեկ ամսվա ընթացքում Ուկրաինայի 232 խաղաղ բնակչի մահվան և 1343 մարդու վիրավորման մասին տեղեկությունները։ Նշվում է, որ սրանք 2022 թվականի ապրիլից ի վեր ամենաբարձր ամսական ցուցանիշներն են։
ՄԱԿ-ի առաքելությունը լայնածավալ պատերազմի ամբողջ ընթացքում մուտք չի ունեցել օկուպացված ուկրաինական տարածքներ, և այնտեղ զոհվածների թիվը չի ներառվում դրա հաշվարկներում։ ՄԱԿ-ը չի տիրապետում ամբողջական տվյալների Ուկրաինայի քաղաքացիական բնակչության շրջանում զոհերի ընդհանուր թվի վերաբերյալ։
ՄԱԿ-ի առաքելությունը գրանցել է ավելի քան 13,500 քաղաքացիական մահվան դեպք լայնածավալ պատերազմի ընթացքում, սակայն «քաղաքացիական բնակչությանը հասցված վնասի իրական մասշտաբները, հավանաբար, շատ ավելին են», հաղորդում է AFP-ն:
ՄԱԿ-ի առաքելության շրջանակում քաղաքացիական բնակչության շրջանում մահացությունների թվի աճը կապված է ռուսական անօդաչու թռչող սարքերի և հրթիռային հարձակումների ինտենսիվության աճի հետ։
«Երկրով մեկ հեռահար հրթիռների և անօդաչու թռչող սարքերի հարվածների ընդլայնումն ավելի մեծ թվով մահեր և ավերածություններ է բերել առաջնագծից հեռու գտնվող խաղաղ բնակիչներին»,- ասել է առաքելության ղեկավար Դանիել Բելը։
Ռուսաստանը պնդում է, թե չի թիրախավորում խաղաղ բնակիչներին և հերքում է նրանց մահվան համար իր պատասխանատվությունը։
Թարգմանությունը՝ Էմմա Չոբանյանի
