Ադրբեջանում «Վագներ»-ի կազմում կռված անձինք են կալանավորվել

Բաքվի Սաբայիլի շրջանային դատարանը կալանավորել է Պետական ​​անվտանգության ծառայության (ՊԱԾ) կողմից քննվող քրեական գործով անցնող 1991 թվականին ծնված Ռամիլ Ալիևին և 1974 թվականին ծնված Իսմայիլ Հասանովին։ Ադրբեջանական լրատվամիջոցների հաղորդմամբ՝ գործի նյութերից հետևում է, որ Պետական ​​անվտանգության ծառայության կողմից իրականացված օպերատիվ-հետախուզական միջոցառումների արդյունքում նշված անձինք նույնականացվել, ձերբակալվել և փոխանցվել են քննչական մարմիններին։

Հաստատվել է, որ նրանք կատարել են տարբեր հանցավոր գործողություններ ինչպես արտերկրում, այնպես էլ Ադրբեջանի  տարածքում։ Գտնվելով օտարերկրյա պետության ուղղիչ հիմնարկներում, որտեղ նրանք պատիժ են կրել այդ երկրի տարածքում կատարված դիտավորյալ սպանությունների, ինչպես նաև այլ ծանր և հատկապես ծանր հանցագործությունների համար, նրանք ընտրվել են «Վագներ» զինված կազմավորման նախկին ղեկավար Եվգենի Պրիգոժինի կողմից, ազատվել են պատժի կրումից և հավաքագրվել տարբեր ռազմական գործողություններին մասնակցելու համար՝ նախապես համաձայնեցված պարգևատրման դիմաց։

Հաղորդվում է, որ նրանք մասնակցել են տարբեր երկրների տարածքներում անցկացվող զորավարժություններին և մարտական ​​գործողություններին՝ օգտագործելով հրազեն և պայթուցիկ նյութեր, ինչպես նաև ներգրավված են եղել Ադրբեջանի այլ քաղաքացիների ներգրավման գործում՝ երկրից դուրս նմանատիպ գործողություններ կատարելու համար։

Ռամիլ Ալիևի և Իսմայիլ Հասանովի, ինչպես նաև Ադրբեջանի և օտարերկրյա պետությունների քաղաքացիների դեմ կատարված այլ հանցագործությունների մեղադրանքով հարուցված քրեական գործը քննության փուլում է։

Ալիևի ու Հասանովի նկատմամբ խափանման միջոց է ընտրվել կալանքը՝ 4 ամիս ժամկետով։

Թարգմանությունը՝ Էմմա Չոբանյանի